المغاربة عقدة كريستيانو: البركاوي وفوزير ربحوه هو والنصر وقللو من حظوظهم فالتتويج ببطولة السعودية

خرجو المغاربة هاد السيمانة فالعود ديال الأسطورة البرتغالية كريستيانو رونالدو والفريق ديالو النصر السعودي، ومن بعد سفيان رحيمي والعين الإماراتي اللي ربحوهم فدوري أبطال آسيا قبل يومين، جات نوبة المغربيين كريم البركاوي ومحمد فوزير مع فريقهم الرائد فالبطولة السعودية.
وسالا ماتش بين النصر السعودي بالنجوم ديالو وكيتقدمهم النجم البرتغالي كريستيانو ضد الرائد السعودي اللي كيلعبو فيه الجوج مغاربة كريم البركاوي ومحمد فوزير ضمن الدورة 23 من البطولة السعودية بنتيجة 3 لواحد، الجوج بيوتا ديال الرائد الأول والثاني ماركاوهم البركاوي وفوزير.
وبهاد النتيجة الجديدة، كتواصل العقدة ديال كريستيانو رونالدو مع المغاربة، بعدما قصاه المنتخب المغربي من ربع نهائي مونديال 2022 هو منتخب بلادو البرتغال وحرم عليه كأس العالم، وربحو سفيان رحيمي فذهاب ربع نهائي دوري أبطال آسيا وصبح مهدد بالإقصاء من المسابقة هو الفريق ديالو النصر السعودي، عقد الثنائي البركاوي وفوزير مع فريقهم الرائد مهمة رونالدو فالمنافسة على بطولة السعودية حيث ولاو بعاد دابا على الصدارة ب9 نقاط.