طي صفحة أغلالو.. تفاصيل رسالة المكتب السياسي للأحرار لمنتخبي الرباط: حنا معكم وغانختارو العمدة لي يناسب المرحلة

علمت "گود" من مصدر مطلع، أن قيادة حزب التجمع الوطني للأحرار، بلغت بشكل رسمي مساء اليوم فاجتماع مستشاري فريق الاحرار بجماعة الرباط، بلي المكتب السياسي معهم وكيدعمهم باش ينجحو تجربة التدبير المحلي للعاصمة.
الاجتماع لي دعا ليه الحزب اليوم، عرف حضور جل أعضاء فريق الاحرار بمجلس الجماعة باستثناء العمدة اسماء اغلالو لي حطات الاستقالة هاد الايام، بحيث تم ابلاغم من طرف منسق الحزب بالعاصمة علاء البحراوي، بلي رئيس الحزب كيقدر جميع المستشارين ومجهوداتهم وبلي العمدة ديال المدينة غاتبقا ديال الأحرار.
وحضر في الاجتماع، ادريس الرازي رئيس مقاطعة حسان، لي دار دور كبير باش يتم عزل العمدة داخل الحزب، ونبه للقرارات الانفرادية ديالها ورفض طريقة تسييرها للعمل الجماعي، كما وقف ضد كل القرارات غير "قانونية" وفضحها قدام الرأي العام المحلي والوطني.
من كوادر الاحرار لي حضرو كذلك، رئيس مقاطعة السويسي عادل الاتراسي، لي كان دائما محط اجماع داخل الحزب، وكانت دارو فين كيدارو الاجتماعات وكيتدخل مرارا باش ميوقعوش خلافات داخل الاحرار فالرباط.
الأتراسي هو دينامو الاحرار دبا فالرباط، عندو علاقات مع رجال اعمال ومنتخبين من مختلف التنظيمات السياسية، ويوصف برجل التوافقات لي كيعول عليه الأحرار باش ينجح التجربة الجديدة للحزب فرئاسة المجلس الجماعي.
فهاد الاجتماع أكد علاء البحراوي بلي الحزب كيدعم المستشارين ديالو، مشيرا بلي قيادة الحزب كادرس جميع الملفات و"السيفيات" ديال المستشارين وغادي يتم اختيار المرشح "ة" الإبرز لخلافة اغلالو.
الغريب فهاد الاجتماع هو حضور ثلاثة مستشارين محسوبين على اغلالو، وساندوها حتى آخر رمق، وهو ما استغربت منه مصادر "كود" حول رغبة هؤلاء في تحمل المسؤولية رغم المشاكل والأخطاء التي دارو مع العمدة، منهم لي عندو تضارب المصالح ومنهم لي معروف بشبهة توظيفات عائلية فالجماعة.