الهلال غيغامرو ضد العين ورحيمي وما غيلعبوش ياسين بونو

كشف الإعلام السعودي أن الگول المغربي ياسين بونو، ما غيلعبش مع الهلال السعودي ضد العين الإماراتي فريق المهاجم المغربي سفيان رحيمي، اليوم الاربعاء فالألي ديال دومي فينال دوري أبطال آسيا.
وحسب جريدة "الرياضية" السعودية، فالبرتغالي جورجي جيسوس مدرب الهلال السعودي قرر ما يلعبش الگول المغربي، وغيحبس بلاصتو الگول السعودي محمد العويس، باش يعطي حلول هجومية أكثر للفريق ديالو بلاعبين أجانب آخرين بحال البرازيلي مشيل ديلگادو اللي غيرجعو يلعب رسمي حسب نفس المصدر.
قرار مدرب الهلال السعودي بأنه ما يلعبش الگول المغربي ياسين بونو كيبقى مغامرة واعرة، حيث الخصم ديالو العين الإماراتي عندو المهاجم المغربي سفيان رحيمي اللي كان ورا إقصاء النصر السعودي من ربع النهائي بالنجوم ديالو وعلى رأسهم البرتغالي كريستيانو رونالدو، بالإضافة إلى أن بونو من أسباب النتائج الإيجابية اللي كيحقق الهلال هذا الموسم وصوفاهم فشحال من ماتش.