—- كاين حنين جارف لأيامات انتصارات أبطالنا فكرة القدم(واخا قليلة وأغلبها بلا القاب)، أو أبطالنا فألعاب القوى، هشام الكروج كان كيخلينا نفتاخرو بأننا مغاربة، كان كيزمت ليا بنادم، وكانت انتصاراته انتصار للمغاربة كاملين، وكنا كنفرحوليه ملي كيربح الذهب والفلوس، كنا كنحسو بحال الى ربحنا كاملين، وكنقولو مع راسنا يستاهل راه واعر بزاف، حتى ذرة ديال لحسد مكانت كتجينا عليه، حيث كان كيفرحنا وكيعزز شعورنا الوطني وكيخلينا نفتاخرو، وهادشي راه يستاهل عليه كثر من داكشي لي ربح.
ولكن ملي ربح ولد يتيم الخمسين مليون فرياضة البوكير، ناض كولشي كيهلل كيفاش ولد قيادي اسلامي(بحال الى بوحدو لي مسلم فالمغرب وبحال الى البوكر حكر على الكفار) ربح خمسين مليون فالقمار، وكيفاش القمر حرام وولد اسلامي كيمارسو، وقيادي فحزب اسلامي حاكم، هاد التسؤلات ديال الكيلو هي لي ضجات بيها المواقع الإجتماعية هاد ليام، وحتى بعض الجرائد الورقية و الإلكترونية
الخبر كانو كيتداولوه بحال الى لقاو الدري خاشي يدو فجيب شي واحد، وأغلبهم كيرجع لثنائية الحلال والحرام. نقدرو نكونوا ضد القمر أخلاقيا، أو بالظبط ضد ادمانه، واخا راه حتى هو بالنسبة ليا اختيار شخصي وشي حاجة كتعطي متعة كبيرة، وبالنسبة ليا أي واحد كيستمتع فشي حاجة فماشي من حق شي واحد آخر يحاسبو، إلا في حالة خرقه للقانون، هادي فحالة كان القانون حداثي ليبيرالي علماني، أما الى كان أصلا النص القانوني كيخنق حرية الفرد فمن الواجب ديك الساعة خرق القانون أو على الأقل التحايل عليه.
البوكير ماشي قمار، هو رياضة معتارفة بيها العديد من الدول فالعالم، وهو ماشي لعبة حظ، بل لعبة عقل وتكتيك ونفسية، وحيث كيتمارس فكازينو مثلا فهذا مكيعنيش أنه بالضرورة قمار، حيث راه العديد من الرياضات كتنظم فالكازينوات منها الفن النبيل أي الملاكمة لي فماريكان كينظمو المقبلات الشهيرة والغالية فأفخم الكازنوات فلاس فيكاس وكذلك فنون القتال المتختلطة، راه ماشي العالم كلو كيمارس الرياضة فقاعة بن ياسين بحالنا.
بالإضافة الى انه راه ماخاصش ديما نربطو الفرد بالإيديولوجية ديال واليديه أو أفراد عائلتو، راه ولد اليتيم ماشي بالضرورة يكون متافق أو نسخة منو، وماشي بالضرورة يتيم خاص يفرض على ولدو داكشي لي كيآمن بيه، أو نحاسبو يتيم على آش دار ولدو، راه تبرهيش وتخربيق وحسد وحقد وتابعة هادشي. ولد يتيم ربح، فراه خاص نفتاخرو بيه لأنه مغربي ربح فرياضة كتطلب ذكاء وكاريزما كبيرة، رياضة مايمكنش لأي واحد يمارسها إلا الى كان عقل نيت نيت، ومن هاد المنبر كنقوليه مبروك، وراك شرفتينا بهاد الإنتصار، واكيفاش ماتخلصش شي قصارة فكازينو السعدي؟
