ماشي غير لوزير بالمختار لي كايفضل يهضر بالفرونسي راه كاع المغاربة عندهم مشكل مع اللغة العربية‎

—
مؤخرا ناض الصداع عاوتاني على ود اللغة العربية ! حيت حقا ما حقا وزير التربية الوطنية سي بالمختار اختار انو يجاوب على السؤال د واحد الصحفية بالفرونسي عوض العربية و هادشي خلا الناس د "الائتلاف الوطني من اجل اللغة العربية " ينوضو يحيحو و يخرجو بيان كايطالبو فيه باستقالة الوزير لانه قام ب "مس خطير بهوية البلاد و تهديد للامن اللغوي و التربوي للمغاربة

هاد الناس لي كانظن عمر الشارع المغربي ماسمع بيهم، و لي كايفكرو و ضارهم خاطرهم من ناحية اللغة العربية واش ماعارفينش بيلا اللغة العربية راه كاتموت و من شحال هادي ماشي تال دابا ! و ملي كايتاهمو الوزير بالمختار بالمس بالامن اللغوي للمغاربة واش كايغطيو الشمس بغربال ؟ايه و الامن الغذائي الطرف خبزي فيناهو؟ راه كلشي فالمغرب عارف بيلا العربية ماكاتوكلش طرف د الخبز ,ليوم، بغينا و لا كرهنا الهوية د المغاربة مامنحاصراش فالعربية، الفرنسية حاضرة و حاضرة بقوةو هاد الهضرة ديال"هوية البلاد و الامن اللغوي" سيرو قولوها للمدارس العليا دالتجارة و الاقتصاد و الهندسة لي كلشي كايتقرا فيهم بالفرنسية ، و لا سيرو قولوها لارباب المقاولات و الناس ديال الموارد البشرية لي مايمكنش يدوزو شي اونتروتيان لشي واحد لاماكنش كايهضر بالفرنسية !


حنا كاملين قرينا فهاد البلاد و عارفين بيلا لي ماعندوش مع الفرونسي راه ماكايطفروش وخا يكون نابغة، و الاغلبية د الناس لي كاتلقاهم مستواهم فاللغة الفرنسية ضعيف و من خريجي الشعب الادبية راهم هوما لي كايعانيو اكثر من البطالة! حيت فحال هاد الناس لاما خدماتهمش الدولة فالتعليم او فالادارة العمومية او فوزارة الاوقاف راه ماغاديش يلقاو خدمة و خصوصا فالقطاع الخاص ! هاد الناس د الائتلاف الله يجازيهم بيخير لي ناضو حيحو على لوزير ، ماكرهناهمش يفهمو بيلا راه المغاربة ماعندهمش مشكل مع اللغة العربية كاع قريناها و كاع حفظنا المحفوظات و كاع درنا الانشاء و لكن راه غير كاتفوت باب المدرسة ماكاتبقا العربية صالحة لوالو ، و غير كاتاخد الباك كايتفرض عليك انك تنسا العربية و خصوصا لاكان عندك توجه علمي لانو مدارس و كليات الهندسة و الطب و الاقتصاد كاتولي فيها العربية خضرة فوق طعام …

المشكل ماش مشكل وزير بقدر ماهو مشكل ثقافة و هوية ، ماشي غير لوزير بوحدو لي كايفضل ربما يتعامل بلغة اجنبية ، حيت بالاضافة لان اللغة العربية ماصالحاش فسوق الشغل و ماكايعتارف بيها لا المشغل لا هاداك لي كايقلب على خدمة ! فهاحنا مثلا بغينا نعطيوها بلاصة بزز و نخلقو ليها فين تكون فالمدارس و الجامعات فراه الدور ديالها غايبقا منحصر فالتلقي، يعني بنادم لي كايقرا راه ماغاديش يتسوق ليها حيت ماكاينينش مراجع علمية باللغة العربية فالعلوم و الاقتصاد و الماركوتينغ و الرياضيات لي يمكن يرجع ليهم و يقرا فيهم ،تخايلو معايا واحد.كايوجد الدوكتورا فالماركوتينغ و لا الفيزياء النووية واش غايلقا شي مرجع باللغة العربية ؟ و لا لقا راه غايلقا شي حاجة قليلة مترجمة و لي ماغاديش ترد على التساؤلات ديالو كاملة !

العربية ماعندهاش بلاصتها فالزنقة ، و فالدراسات العليا، و فالبحث العلمي و فسوق الشغل فكيفاش بغيتو تدخلوها صحة ؟
هاد الناس لي تقلقو من "تكريس التبعية للنموذج الفرنسي" واش مافراسهمش بانو التبعية اللغوية راه مفروضة بحكم التبعية الاقتصادية و حتا الثقافية و ماعليها لاين طول ما اللغة العربية كلغة محصورة فالشعر و الادب و الكتوبة د وصفات الطبخ و عذاب القبر راه التبعية غاتبقا فارضة راسها للنموذج الفرونكفوني واخا هو نموذج متجاوز الآن و الاغلبية د الدول تتجه للنموذج الاونكلوفوني حيت اكثر تأثيرا عبر العالم ، اما الفرنسية راه فوت فرانسا و بلجيكا و دول بعض دول افريقيا فراها ماكاتوكلش طرف د الخبز.المهم انو التبعية راها كاينة و ماغاديش تتبدل الحالة فالامد القريب او المتوسط و الاكيد انها ماغاديش تبدل ببانات الشجب و التنديد و المطالبة باستقالة فلان و تعيين فرتلان