ها علاش عبد السلام باس يد ملك السعودية وما كرهش يبوس ليه الرجلين كاع. هو المستفيد الاول من زيارته الى طنجة وزيارة وإقامة لشهر كافية لإضافة أصفار في ثروته ولمدينة ما رابحة والو من هاد الزيارة (فيديو)

علاش هاداك الراجل وحداه سيد اخر تلاح على ملك لسعودية سلمان بن عبد العزيز وباس ليه يدو باش حطات طائرتو فمطار ابن بطوطة بطنجة الاسبوع الماضي، اولا خاصنا نعرفو شكون، السيد هو عبد السلام شقور، محافظ قصر الملك السعودي في طنجة ومالك فندق "ميراج" الشهير القريب من مغارة هرقل وشاطئ طنجة الجميل اشقار.
السيد اللي كان وراه هو خوه احمد شقور، من غير انه كيخدم معاه راه كيسير فندق "ميراج" اللي كانت البارصا بنجومها أمثال ميسي جلسو فيه نهار لعبو مع الرجاء وربحوها ب8 لصفر. هاديك البوسة ما يعرف قيمتها الا عبد السلام وخوه" يقول احد معارفه ل"كود".
زبون للفندق الشهير اللي جا بمحاداة القصر الملكي بطنجة قال ل"كود" انه حاول قبل ايام حجز غرفة "كالو لي كلشي عامر" فالملك لما يصل يكون رفقته وفد كبير وحدة للجيش وحرس وأبناء ويزوره أصدقاء وزعماء دول وعليه يتم حجز كل فنادق طنجة تقريبا المعروفة اما الميراج فيصبح بالكامل فندق الملك وحاشيته. "ايلى دوز الملك ديال السعودية 15 يوم راه يقدر يسد ويرتاح حقاش دخل فلوس عام كلها وربح مزيان" يشرح مصدر ل"كود".
الاخوان شقور هما اللي رابحين من هاد الزيارة المالكة والشراب والنشاط والجولات كلشي اللي غادين يحتاجوه يتكلف بيه المحافظ ولمدينة ما كتستافد والو، ماشي بحال برا كاين محلات تجارية راقية وشركات لكراء السيارات وووو وهاد الشي كينعش لمدينة كلها، فطنجة كلشي يولي ديالهم بلا ما تربح منهم لمدينة شي حاجة كثيرة