الحل ديال العنف ضد النساء راه بيد العيالات ماشي الرجال ! المرا لي خاصها تكون لالة و مولاتي و تنوض دافع على راسها بلا ماتساين الأمم المتحدة تهضر ليها على حقها ! و الحكار يتربى !

المشكلة في قضية العنف ضد النساء هو أنو المرا طرف اساسي و مهم بزاف فيه مايمكنش نبسطو المسألة و نشوفوه على انو عنف كايمارسو الراجل على المرا ! حيت المرا هي لي كاتربي لينا راجل مريض نفسيا بالنسبة ليه الرجولة هي الحكرة هادي من ناحية و من ناحية اخرى المرا (الزوجة و لا الصاحبة) لي كايتمارس عليها عنف و هي ساكتة و ضاربة الطم و ماكادافعش على راسها تاهي مسؤولة على داكشي لي كايوقع ليها!
الخطاب ديال " المرأة هي أمك هي اختك هي بنتك " راه ماواكلش مع بوزبال لي كابر فمجتمع بهيمي! وي مزيان نحتافلو باليوم العالمي لمناهضة العنف ضد المرأة و لكن الحل الجذري والواقعي راه ماكاينش وسط دوك اللقائات لي كايتنظمو فشي اوطيل سانك ايطوال فكازا و لا الرباط ! وفدوك الارقام و الاحصائيات لي كايتصايبو بpower point ! داكشي كايبقا هضرة ! مبادرات رمزية و صافي اما الحل الواقعي راه فيد المرا!
الحل أولا فيد المرا الأم لي كاتربي لينا راجل معاق ! عاجبينو كتافو و كايصحاب راسو هو مركز الكون و باش يبان راجل على (مرتو و لا صاحبتو) راه عادي يضربها ! عادي يمد يديه عليها و يصرفقها و لا يركلها و لا يفرشخ ليها العين و لا يشرملها كاع … هاد الثقافة البهيمية ماكايناش غير عند الهايش مايش و لا غي عند لي ماقاريش ! كاينين اليوم رجال قاريين و واعيين و بيخير عليهم(يعني داك الضغط النفسي ديال طرف د الخبز ماعندهمش) و كايفرشخو عيالاتهم !
وكاينين طبيبات و استاذات و اطر و موظفات و بنات عائلات كاتخلى دار بوهم كل نهار ! العنف ماخطا حتى فئة اجتماعية ! يمكن يكون اكثر عند الفئة الأولى نظرا لمجموعة من الضغوط النفسية و لكن راه اليوم كاين عند كلشي ! علاش؟ حيت المسألة مسألة ثقافة و تربية! المرا الأم لي كاتربي ولدها و بنتها على اساس أنو الولد حسن من البنت و أن البنت خاصها تسمع لخوها و تتسخر لخوها و تسمح فحقها لخوها راه كاترتاكب جريمة فحق داك الولد بداك الفشوش الباسل لي كاتعيشو فيه وكاتسيفط للمجتمع راجل (برهوش) عندو مفاهيم مغلوطة على العلاقة بين الراجل و المرا ويصحابو راه بالضرب غايبان راجل قدامها ! فشوش الامهات هو لي كايخرج لينا جيل معاق ديال الرجال الحكارة ! حيت العنف حكرة! دوك الامهات لي كايبقاو حاضنين على ولادهم فحالا والدة السلطان سليمان القانوني هو راسو قد الطارو د كولورادو و كاتكذب عليه " المخيرة فالبنات نجيبها لوليدي" بشاخ والدة لينا يوسف بن تاشفين! كاتفتف عليه و تخاف منو و تخليه يسيطر عليها و على خواتاتو زعما راه "راجل"!
و من بعد فاش يتزوج يدي معاه ديك التربية المعاقة لدار مرتو!
الحل الثاني ضد العنف أو الحكرة! هو أنو ديك المرا لي كايتمارس عليها عنف ماتبقاش ساكتة و صابرة و كاتاكل التصرفيق وهي حانية الراس! زعما راني بنت الناس صبارة " و تدخل فداك دور الضحية و تستحلاه! صافي ضربك دافعي على راسك بجميع الوسائل الممكنة !كوني لالة و مولاتي ماغاديش تسايني نتي الأمم المتحدة تهضر عليك نتي ساكنة فدوار الحاجة فالرباط ! ولا تسايني داك اليوم العالمي لمناهضة العنف ضد النساء ! ضربك دافعي على راسك! عرفيه حيوان و غايعاود يضربك لاماقمعتيهش !الاحترام هو اساس جميع العلاقات الانسانية السوية حتى باك و مك لي ولدوك خاصهم يحتارموك و يحتارمو الجسد ديالك ! ماشي يجي واحد خامج يحط عليك مكاشفو ! راه العلاقة لي مافيهاش احترام متبادل ماعمرها كاتكون علاقة متوازنة ! ايه تقدر طول ! تقدرو تعيشو مع بعضياتكم و ديرو وليدات ولكن ماعمر شي مرا كاتكون فرحانة و هي عايشة مع راجل حكار !
لا كنتي مرا كاتقراي هادشي و كاتاكلي التجنديخ و ساكتة خاصك تعرفي بيلا غاتبقاي تاكليه حياتك كاملة ماعمر بوعو ماغادي يتبدل و غادي تعيشي تعيسة و تعقدي ولادك !لا كانو دراري غايخرجوا فحال باهم و لاكانو بنات غايكبرو معقدات من الرجال و غاتجني عليهم! ماعمرهم غاتكون عندهم علاقة سوية و متوازنة مع الجنس الآخر. بقاي تسايني الأمم المتحدة و اليوم العالمي لمناهضة العنف تال شي نهار يهزوك كوما …
ولا كنتي راجل و كنتي كاتسلخ مراتك و صابرة معاك
راه ماشي حيت كاتبغيك و عاجبها راه غي حيت ماعندهاش بديل عليك و صافي ! بلا ماتفتاخر بزاف و تعنى بصحتك ! راه كون لقات حسن منك كون ساستك شحال هادي! و غاتكون غالبا كاتفكر فماحسن منك …
الاحترام … الاحترام هو الأساس !