كلشي كايهضر على قمة المناخ فالعالم إلا عندنا حنا ! الاغلبية ديال المغاربة كايحسو براسهم معنيين بموضوع رفع الدعم عن السكر و البوطا و الطحين اما المناخ ماداخلش فالحساب حيت ماكايتكالش!

مؤخرا العالم كولو كايهضر على قمة المناخ لي دازت فباريز و لي كان حاضر فيها سيدنا !إلا فالمغرب، المغاربة ماكايحسوش براسهم معنيين بفحال هاد المواضيع ديال المناخ و البيئة و داكشي ! فحال هاد المواضيع كايجيوهم un luxe واحد الحاجة لي مايمكنش ليهم يفكرو فيها دابا و هوما كولا واحد مضارب مع طرف د الخبز … الأغلبية ديال المغاربة كايعيشو " النهار بنهارو" ماشغلوش هو فشنو غايوقع من بعد و فثقب الأوزون و التغيرات المناخية و الكوارث الطبيعية لي يمكن تجي بسباب هادشي !
و هاد القضية راه معقولة ! حيت باش يوصل الانسان لهاد مستوى التفكير فالمناخ و البيئة خاصو يكون بعدا مهني من الكرا و الما و الضو ! خاصو يكون ماعايش حياتو كي حمار الطاحونة من هاد الخدمة لهاد الخدمة تا نهار كايموت واقف … مالو مسكين ؟ والو بغاه الله !
لي كايفكر فالمناخ و البيئة هوما الدول لي اصلا مسؤولة على هاد المشكلة ! حيت الدول الفقيرة فحالنا لي ماكاتصنع تا برا د الخياطة ماشي هي لي كاتلوث الكرة الارضية ! ولا كانت كاتلوث فراه غي واحد الشويكيكة من داك التلوث الكبير لي كايديرو الدول المصنعة ديال بصح ! حيت لا يعقل اننا اليوم نقارنو داك الديشي ديال المعامل ديال فولسفاكن فالمانيا و النووي ديال فرانسا و وزينات الالكترونيك ديال الجابون بالخرا ديال المغاربة لي هو التلوث الوحيد لي كانديرو !و لي كايبقا تلوث حنين و درويش و ماشي خطير على الكرة الارضية بالعكس … كاينفعها و يزيد يخصبها!
ببساطة المغربي اليوم ماكايحسش براسو مقصود بهاد النقاش ديال المناخ حيت من واحد الناحية هو ماعندو نووي ماعندو يورانيوم ماعندو معامل و مصانع كاتلوث الهوا و الارض … و من ناحية اخرى مامساليش ! خدام مضارب مع طرف د الخبز ! تايشد كونجي و يفكر فالمناخ … المغربي و فاش كانقول المغربي فأنا كانقصد المغربي المتوسط العاد ! داك المغربي بغا لي يهضر معاه غا على الخبز و السكر و الزيادة فالبوطة ! المناخ و البيئة كايحس بيهم مواضيع بعاد عليه حيت ماكاياكلهمش ! و ماكايصرفهمش فلوس…
ولكن الاشكالية المطروحة اليوم هي انو المغرب غاينظم العام الجاي la cop 22 فمراكش!فحال هادشي لي دايرين فباريز اليوم و غايجيو ليها بزاف د الدول باش يناقشو التغيرات المناخية ! و المغرب حيت هو الدولة المستضيفة خاصو يهضر على شنو دار و شنو كايدير باش يحافظ على المناخ و البيئة و اقتصاد الطاقة! المشاريع كاينة و المخططات كاينة ! عندنا وزارة على قدها مكلفة غير بالبيئة بوحدها ! و عندنا مشاكل كبيرة مرتبطة بكيفاش المغاربة كايسيرو الزبل ديالهم ! الزبل ديال الديور و الطبيطارات (لي خطير بزاف) و المعامل ! فين كايمشي داكشي ؟ و كيفاش كايتلاح ؟ و فين كايتلاح؟
عندنا تاحنا رهانات و تحديات و لكن كاتبقا حابسة غير فالوزارات حيت المواطن اليوم ماحاسش بالأهمية ديال هادشي … المواطن بغا ياكل و يشرب و ينعس و مايزيدوش عليه فالبطاطا و اللفت و مايحيدوش الدعم على القوالب باش يعمر البريريد !و لي بغا المناخ و البيئة العام طويل …