ديكابريو يعلن عن نيته في الانضمام لحركة عشرين فبراير …..وها علاش

—
الاوسكار هاد العام كل المؤشرات تصب في اتجاه أحقية ديكابريو بالظفر به عن فيلم "ذي ريفنت"…..فقط اقول فقط لانه ماكاينش شي منافس صنديد كما هو الشأن لديك المرة الفايتة ….وثانيا لانو خصهم يعطيوها ليه اودي غا على سبيل الشفقة كيفما دارو معه فيلغولدن كلوبز قبل ما يبدا يبكي ليهم تما …لان السيد بزاف ديال لمرات كيتخور… وهاد العام خصيصا دار مجهود إستثنائي في ذي ريفيينت وخ ليستوار ديال الصراع من أجل البقاء في اعتقادي انا بعدا مستهلة جدا وتعاودت بهاد الشكل شحال من مرة بحال ففيلم the grey ولكن فارق لي كاين هو ان خونا فهاد الفيلم الاخير حاول يلعب على النقاط لي يقدرو يستجديو تعاطف الاكاديمية عكس الافلام لاخرا ديالو لي على الرغم من ضخامتها على جميع الاصعدة بحال مثلا titanic و django و catch me if you can و
the wolf of wall street أيلا انه خرج منها بخفي حنين بحيث أنه بقدر ما حققت هاد الافلام ايرادات هائلة وسمعة فنية زوينة بقدر ما هو فشل فشلا ذريعا في إقناعنا بأنه قام كممثل بشي حاجة خارقة للمألوف وبقدر ايضا ما فشل في عدم إستيعاب لبلان لي ديجا ممثلين كبار بحال توم هانكس والداهية راسل كرو وسميث وماثيو عاقو به ديال ضرورة لعب اداور مُدغدغة شيئا ما لمحاسيس بحال مثلا شي إنسان معاق أو مريض ولديه مشاكل عقلية ونفسية بحال ف A beautiful mind وforrest Gump ..اولا يثر مواضيع تجسد شي موضوع شائك بحال نبذ العنصرية ولا مظلوميات اليهود….

لكن مع الاسف صاحبنا تا الوقت بدل الضائع عاااد فاق من لكلبة ديال انه ماشي ديما انتقائية الافلام بعناية دقيقة دونما تبدل عليهم نتا كممثل أي مجهود تقدر تربحك الاوسكار … خصك تدمر على رزقك وتغير من شكلك احيانا والوزن ديالك وتبوكيصتك بحيث ان الجهود الجسدية تُعطى ليهم أهمية ربما قصوى باش تكاليفا وهذا ربما عامل كان حاضر بقوة فلفيلم لخراني ديالي ديكابريو را غا داك المشهد ديال الدب خسر عليه شي تمنية السوايع وهو كيوجد فيه وكيصاوبو ليه في الجروح "الافتراضية"…. ثم زيد عليه اللقطة الاولى …فحسب ما يُتداول …را جوج سيمانات لي استغرقت في التمرين عليها…

لهذا أنا كيبان لي في حالة ماداهاش فاكيد غادي يدير ليهم تما شي عشرين فبراير تاهوا مافيهاش ويطالب بإسقاط النظام "السينمائي" ولا غينوض يتعرا على بوهم وسط الحفلة ..