إنوي وميدتيل واتصلات …. الكريساج الناعم ….قاليك أسيدي شري تندغ ..كري تبات

—
الشركات ديال الاتصالات فلمغرب الليعطينا بركتهم ماكرهوناش نرجعو لديك الحقبة لجوراسية منين كنتي كتمشي تشد الصف على تيليبوتيك نص نهار …. او مني كانت كتاقم عليك مكالمة لا تتعدى أنك كتقول فيها ألو كتلقى وكتمشي ليك عشرين درهم واحيانا لا يحتاج الامر منك تا ديك الو، تقدر تخلي غير التعبئة شي سيمانة بدون ماتكونصوميها كيديوها ليك حلالا طيبا .. وكنا ديك الساعات كنتقبلو الامر بكل روح رياضية، وكتمشي عاود كتجري عند موحماد مول لحانوت كتشارجي شي عشرين درهم اخرا

منين بدات المنافسة على إستقطاب اكبر عدد من لكليان بدات كيطيحو نوعا ما من كوراريهم تدريجيا باش مانعيقوش بلا في الاصل راه كانو حاشرينو تا لزداكاداك ،
غير هوا ماقدروش يجاريو منافسة البديل لي ولا كيلتجىْ ليه بنادم في الانترنيت المتمثل في لواتساب ولفايبر ولفيسبوك وسكايب وناضو دارو واحد الخطوة ديال إلغاء خدمة VOIP لي من المفروض أنها مجانية حيث منين كتكون تيلشيارجيتي لكونيكسيو تلقائيا راك خصك تستفد منها .وهاد التطبيق كيوفروه كاع التطبيقاتلي ذكرنا

الناس ماعرفاش للأسف أنه كاين هنا واحد لافونتاج ديال المستهلك وهو انه عندو سند قانوني باش يقدر يرفع دعوى على هاد الشركات وكاينة إحتمالية كبيرة جدا في كسب القضية ، في حين انه الشركات لي قامت بهاد ماكننش عندها تا شي سند قانوني
هي لعبت فقط على المعطى ديال انه أصلا تا شي حد ما تسوق في الاول مني دارو الخطوة لي كان عبارة عن جس النبض عبر الغاء خدمة VOIP من 3G من بعدا ما شافو أنه تا شي ردة فعل قوية ما دارت إتجاهم إزاء هاد الخطوة ناضو حيدو تا ديال ADSL

هادشي يفيد بما لا يدع مجالا للشك أنه عند بال هاد الشركات ان بنادم كيعيش باقي فدار غفلون، في حين أنه بخطوات بسااااط جدا بحال لي قامو بها نشطاء في لفيسبوك وناضو حيدو ليجيم من صفحاتهم ممكن نخليوهم يفهمو مزيااان أنهم راه "هما" لي فحاجة ليهم أكثر بكثيييير ما "حنا" في حاجة ليهم