ها التبرهيش بدا: واش كي الصطل كي القب: واش كي حمدي ولد الرشيد كي ابراهيم الفاسي الفهري. كيفاش واحد ما قاريش بحال ولد الفاسي الفهري كيهدر كلام هو ما فاهموش والدولة العميقة اللي فيها بوه باغية دوز ميساجات

مع هاد الهيلالة اللي نايضة على الصحراء. زيارة بان كي مون للبئر لحلو ووصف المغرب بالمحتل للصحراء ثم بيان الخارجية الاول وقرارات المغرب غير المسبوقة بوقف كل اشكال التعاون مع الامم المتحدة، تحرك مغاربة وصحراويون وحدويون للدفاع عن القرار المغربي. مسيرة يوم الاحد شارك فيها عدد كبير من المغاربة لا يهم 500 الف او 3 مليون المهم لم يسبق في تاريخ المغرب ان خرج مغاربة بهذا الحجم في قضية. مزيان يخرجو على الصحرا ماشي على فلسطين والعراق ووو. ثم مسيرة شارك فيها اكثر من 160الف شخص في قلب العيون في سابقة لم تعهدها مدن الصحراء. دابا كلشي محزم خرج واحد لمفشش ما قاريش وعندو معهد كي دار ليه الله اعلم اسمه "اماديوس" يدعى ابراهيم الفاسي الفهري اللي هو ولد الطيب الفاسي الفهري مستشار الملك محمد السادس وناض كيهدر هدرة اكبر منو. باك اللي كان فالخارجية ما طفروش وحصيلتو فالديبلوماسية ماشي ايجابية
كالو ليه يكول لان ثقافته لا تسمح له بالكلام اللي كانوا ونشرو فموقع "اماديوس" ان هناك مشروع اممي باش يرجعو الصحرا "كومنولث". ودخل كيرد وكيتكلم.
طبعا من حق كل مغربي يتكلم ويبدي رأيو في الصحراء. ياك قضية المغاربة الاولى. اللي ما من حقوش هو يكون بوق لجهة فالدولة العميقة. يبدا يبان فالواجهة. دابا كي الصطل كي القب. حمدي ولد الرشيد شيخ قبيلة ورئيس المجلس البلدي للعيون خرج فظرف قياسي اقل من 24 ساعة فالعيون 160 الف شخص هادا يهمشوه ويبعدوه من كل نقاش يهم الصحراء وهو اول المعنيين به ويفتحو الباب يعاونو واحد ما قدرش بوه يدخلو مدارس كبيرة ففرنسا رغم كل التدخلات ومشى لكندا وجا، ويولي كيفهم فملف. شوف اسي ابراهيم اللي كتبتيه كبير عليك وابسط واحد فالمجلس البلدي باحدى مدن الصحراء الغربية في الجنوب المغربي فاهم اكثر منك وبزاف هاد الملف. فاهم ابعادو التاريخية فاهم القانون الدولي واش كيكول فيه.
باراكا من لبسالة. كنا كنعتاقدو باللي مسيرتي الرباط والعيون غادي يكون "لها ما بعدها" كيف قال رئيس جهة العيون الساقية الحمراء بوجدور، ولكن باش بان هاد الولد وطبعا من وراه ناس كيكتبو ليه بالعربية وباي لغة اخرى وفيهم ناس فوزارة الخارجية. نكولو هاد الشي بزاف. دابا المغرب قدامو حمدي ولد الرشيد والفاسي الفهري. يختار اللي بغى ويتحمل تبعات اختيارو من بعد