علاش السياسة معطلة على تغيرات المجتمع: السي نبعد الله فين شفتي شي نهار "كتلة ديمقراطية" مشكلة من التقدم والاشتراكية والاتحاد الاشتراكي بلا حزب علال الفاسي

عبد اللطيف اگنوش أستاذ باحث جامعة الحسن الاول سطات ///
مجتماعنا كايتغير، والعائلة فيه كاتتطور نحو "الأسرة النووية" و"الفردانية"، هذا واقع كاتقولو لينا الدراسات والإحصائيات الرسمية وحتى المحايدة وغير الرسمية…ولكن كايبان ليا أن البنية والاشتغال ديال المنظومة السياسية في بلادنا معطلة بزااااف…وكانخاف أن الكلام ديال "زارتمان" في الخمسينات والستينات، والكلام ديال "واثربوري" في السبعينات، وغيرهوم كثار، بللي العلاقات بين التكتلات السياسية والدولة باقا هيا هيا…بمعنى أنها باقا ما كاتخضعش للعامل الإديولوجي والفكري السياسي في ردود الأفعال السياسية والعمل السياسي…
سبب هاذ التهدريز ديال هاذ الصباح، هو الخبر للي قريتو حول لقاء "زعيم" التقدم والاشتراكية، و"زعيم" الاتحاد الاشتراكي، باش يحييو من جديد "الكتلة الديمقراطية"…
قريت الخبر وهو ينزل ليا الما في الركابي، الله ينجيكم…علاش؟
ذاك النهار، سيدي محمد نبيل بنعبدالله تلاقا معا سيدي بنكيران، ونظموا اللقاء "في أفق انتخابات أكتوبر المقبل"…يعني "لقاء تنسيق" بالتمام والكمال في مواجهة "المعارضة" ديالهم مادامو أنهم حلفاء في الحكومة الحالية…وطبيعي أن دماغي يقول ليا، وقلتها ليكم حتا نتوما، بأن المعني بهاذ "الهجمة" هوما الاتحاد الاشتراكي، والبام، وحزب الاستقلال، والناس للي خارجا كاع من "اللعبة السياسية"…وبجوجهوم قالو لينا بأن التقدم والاشتراكية والبيجيدي تحالفو في الحكومة الحالية لأنهم عاشوا نفس تجربة "المراجعات الفكرية والإديولوجية"…مزيان الله يعاونهوم…
ولكن للي ماشي مزيان، بالنسبة ليا بالطبع، هو أن سيدي محمد نبيل بنعبدالله، من بعد أسبوع على هاذ اللقاء، كايدور بحال "الطرومبية" بميا وتسعين درجة، وكايتلاقا بسيدي إدريس لشكر، لأنه، كايقول هو، "كاتجمعهم
وكاتوحدهوم "منظومة فكرية راقية" !!! واخا ذاك النهار ما لقا حتى حرج أنه يقول لينا بللي الحزب ديالو "دار مراجعاتو الفكرية والإديولوجية"، وما خلا في الاتحاد الاشتراكي وصحابو غير للي نسى "مالك في الخمر"…
دابا سيدي بنعبدالله بغا يقنعني بللي هناك فرق بين "السياسة والمواقف والتحالفات السياسية" وبين "المنظومات الفكرية"…نحلف ليك بالرب آسيدي نبيل ما فهمت شي وزة من هاذ الكلام، واضحك عليا إيلى بغيتي…
بغيتي تحيي الروح في "الكتلة الديمقراطية" لاش؟؟؟ آشناهو الميساج للي بغيتي تعطيه الاتحاديين، والكواشا، واليساريين للي داخلين للعبة السياسية، وغيرهم؟ آشنو هو الميساج للي بغيتي تعطيه لحزب البام للي حتى هو فيه ناس كانت "كواشا" بكري بكري، قبل ماتدير حتى هيا "المراجعات الفكرية" للي فركعتي ليا بيها قلبي؟؟؟ ثم واش باغي تحيي "الكتلة الديمقراطية" بلا حزب الاستقلال للي ديما كان العمود الفقري لهاذ الكتلة ديالك؟؟ فين عمرك شفتيها؟؟ فين شفتي شي نهار "كتلة ديمقراطية" مشكلة من التقدم والاشتراكية والاتحاد الاشتراكي، بلا حزب علال الفاسي، للي حتا هو ما خليتي فيه ما قلتي هاذي غير عشرة أيام بطريقة التقلاز من تحت الجلابة، وبعد المرات بالعلالي؟؟؟
قول ليا آخويا: "أنا كانمثل حزب كايعرف منين كاتكال الكتف، وحزب للي باغي يشارك في أي حكومة مقبلة واخا غير بعشرة نواب منتخبين، وواخا يكون كا يترأسها الشيطان براسو، وباغي شي دفيعات من عند الجميع واخا يكونو شياطين كاع…" هاذيك الساعة غادي نمشي معاك ونشججعك على هاذ البيعة وشريا…
كيفاش دابا مانصدقوش "زارتمان" و"واتثربوري" للي كانوا كايقولو لينا "راه ماكايناش إديولوجيا عند أحزابنا، كاينا غير المصالح الآنية والمستقبلية والظرفية"…مصالح للي في الحقيقة "فئوية" وبعيدة عن الشعب الحازق والعيان والمريض، وللي باقي في دار غفلون…
نوصصيكم يا الإخوان، إيلى بغيتو تفهمو شويا السياسة في البلاد، سيروا للعراسات والمناسبات الخرى بحال الجنازات مثلا، وشوفو شكون حاضر وباغي يبان بللي حاضر
إيلى كانت "المناسبة" عند استقلالي مثلا، غادين تلقاو البيجيديست، واليساري، والكوشي، والبوليسي أو المخزني الكبير، والعدلاوي ديال المرحوم ياسين، والسلفي الجهادي، وجميع ممثلي الأطياف السياسية في البلاد…كولهوم يا إما كايستامعو للقرآن إيلى كانت جنازة ولكن كايديرو "ليزاففير"، يا إما كايلووزو إلى كان شي فرح…