على هامش النقاش حول الجهوية…نظرية المؤامرة تؤدي حتما لخطاب التخويف والتخوين…

عبد اللطيف اكنوش استاذ باحث في جامعة الحسن الاول بسطات /////
في 11 مارس الجاري، تدارت واحد الندوة دولية نظمها "مارتيل للإعلام والتواصل" بمكتبة أبي الحسن الشاذلي حول موضوع الجهوية…هاذ شي مزيان وكا يبشر بالخير في هاذ الزمن ديال القحط الثقافي والفكري والسياسي…لأن ندوة بحال هاذ للي كا تدرس بالأساس آفاق الديمقراطية في بلادنا ما يمكن الواحد إلا يشجعها ويشد بحرارة على أيادي الناس للي نظموها..
لأنه بغينا ولا ما بغيناش، الديمقراطية ديال الصح كا تبدا من الحومة، ومن البلدية، ومن الجماعة القروية، ومن الجهة…وما خاصناش نعولو على "الدمقرطة من الفوق"…هاذي ما عمرها طفراتو وما عمرها تطفرو…إيلى الناس ما خذاتش تسيير أمورها مباشرة بديها، راه ما كاينا ديمقراطية ولا ستة حمص…
ولكن للي ثارني شويا في هاذ الندوة، أن بعض الخوت، صرحو من بعد، بأن بنادم خاصو يحضي من بحال هاذ الخطابات حول الجهوية والديمقراطية المحلية ودوك الستون…وقال بالحرف ما يلي: "عندما يقال داخل ندوة بأن المغرب يجب أن يقسم إلى جهات وكل جهة بعلم، فهذا يحتاج إلى جواب كي يتم على الأقل تنوير الناس الذين يطرحون هذه الأطروحات، لأن هذه الأفكار ليست أفكارهم ويجب الانتباه إليها ولكن دون السقوط في نظرية المؤامرة … هذا المخطط الإمبريالي يتحدث كذلك عن تقسيم السعودية إلى ثلاثة أقسام وتقسيم الجزائر كذلك وورد هذا المخطط في تصريحات وكتب نشرت لموظفين مسامين ومسؤولين عالميين "…
للي فهم خوكم وقراه على وعدو وسعدو، هو أن هناك عدو كا يتربص بنا حنا المغاربة، وكا يوجد من شحال هاذي باش يقسمنا، ويضحك علينا، ويوهمنا بأنه باغي لينا غير الديمقراطية والخير..لأنه راه قسم بعدا العراق وأفغانستان وسوريا وليبيا، ودابا راه معول يقسم الجزائر ثم المغرب…هاذ العدو الملعون هو الأمبريالية، وكاع الكلمات للي كا تسالي ب "ية"…هو عدو أجنبي كيهددنا، ولكن، خدامين معاه في نفس الوقت بزاف ديال خوتنا ما عايقينش، ولكن بعد المرات، كا يكونو حتى عايقين وعارفين آش كا يديرو…
إيلى ما كانش هاذ الكلام هو "الرب" ديال نظرية المؤامرة، وحتى "تخوين الآخر"، آش غادي يكون؟ و بصراحة، والله إيلى كا نتمنى يكون هاذ الكلام غير زلة لسان وننساوه وصافي..علاش؟
لأنه كا يبان ليا بأن المستقبل ديال جميع سكان العالم ماشي هو الدولة القومية، بل هو المجموعات الجهوية القوية اقتصاديا ومؤسسيا واجتماعيا وديمقراطيا…بطبيعة الحال، حتى واحد ما قال بللي غادين نفرطو في الدولة القومية… أبدا…للي هو مهم، هو أن الجماعات المحلية والجهات، ونسميوها حتى "دويلات"، تسير نفسها بنفسها مع الحفاظ على الرابطة الوطنية للي كا تجمعها مع الخرين بحال النشيد الوطني، ولا العملة ديال الريالات، ولا التانبر، ولا دوك التويشيات الخرا…وهاذا ما كا يمنعش أن كل جهة أو كل دويلة يكون عندها "درابو" ديالها، فين هو المشكل مادام الأساسي مضمون بالمؤسسات وبالديمقراطية؟؟؟
هاذا غير باش نقول راه حان الوقت عندنا باش الدولة القومية تهز قلوعها وتهز يديها على تدبير شؤون الجماعة المحلية انطلاقا من العاصمة…بعبارة أخرى، راه النظرة والإيديولوجية "اليعقوبية" المؤسسة على مركزية القرار ومركزية التدبير السياسي، وللي هيا مناقضة تماما مع المبادئ الديمقراطية، مشات بحالها وصبحات في خبر كان، ومن شحال هاذي…
"آلور ميزامي"، عنداكم من نظرية المؤامرة، وعنداكم من "خطابات التخويف" للي كا تنتاهي حتما بتخوين أبناء الوطن الواحد…لنعمل في خطاباتنا بمبدأ "سلطة الحجة"، وليس بمنطق "حجة السلطة"…