امولى نوبة. دارها عاود ثاني الحموشي: غادي يبقى حتى يسالي مع الفساد فالبوليس: ها علاش توقف والي الامن مدير مديرية نظم المعلوميات والاتصال والبطاقات التعريفية ونائبه واخرين

عبد اللطيف الحموشي المدير العام للمديرية العامة للامن الوطني حالف ما يتفاك مع الفساد فهاد المديرية. الحموشي كيكول دابا امولى نوبة ومحاربة الفساد ما غادياش توقف وغادية تشمل كل المديريات والمصالح.
اخر عش الدبابير اللي فتحو او اخر ورش وصل ليه وما غاديش يكون الاخير٬ كيهم مديرية نظم المعلوميات والاتصال والتشخيص اي كلشي عندو علاقة بالماتيريال انفورماتيك وترانسميسيون ولاكارط ناسيونال. مهمة هذه المديرية كما حددها القانون هي "وضع المخطط العام لنظم المعلوميات وتدبيره" و"إنجاز الدراسات الهندسية لشبكات الاتصال وإحداث وتشغيل واستغلال ومراقبة وصيانة منظومات الاتصال المؤقتة أو الدائمة" و"إنتاج الوثائق التعريفية المؤمنة والتشخيص اليدوي والآلي وكذا توثيق وحفظ المعلومات المركزية".
حسب مصدر "كود" فان تحقيقا داخليا مازال خدام لحد الان فهاد المديرية". غير باينة الريحة عطات فالاول وطلع لخنز بالزربة وعليه تضيف مصادر "كود" تم اعفاء مديرية المديرية والي الامن النعيمي ومساعده. بجوج مشاو لديورهم. كما تم اعفاء "كل المساعدين ديالو اللي تبتات المسؤولية ديالهم فالاهمال وسوء التدبير واختلالات في التسيير".
هادو اش دارو؟ حسب مصدر "كود" فانه تم الوقوف على سوء تدبير المخزون واهمال الصيانة وغياب العقلانية فالتسيير وسوء التدبير.
مشروع الحموشي الاصلاحي بالمديرية العامة للامن الوطني دشنه عبر اطلاق اوراش كثيرة وبالتدرج. بدا بورشة القضاء على الفساد والمحسوبية وولى لاول مرة يمكن فتاريخ المديرية التوظيف بالكفاءة وقضى علي "باك صاحبي" داز لملف اخر كان عش للفساد وهي المديرية المكلفة بحضيرة السيارات ودار اصلاحات كبيرة وولي ليصانص على الكيلومترات وحيد السيارات القديمة المكلفة من حضيرة المديرية وداز لورش التكوين اي كل ما له علاقة بالموارد البشرية ودار ترقيات للبوليس وطبعا الاهم انشاء جامعة لعلوم الامن اللي غادية تولي فبلاصة اكاديمية الشرطة بالقنيطرة
هاد البوليس اللي فموقع المسؤولية ما كيحشمش. الحموشي هادي عام باش وصل وعطى للمدراء كلهم فرصة يقادو مديرياتهم ولكن بعضهم اعتقد ان هاد الاصلاح اللي بداه المدير العام غير للتسويق الاعلامي وصافي ودابا كيوديو.
هاد الاصلاحات الهيكلية العميقة فالمديرية العامة للامن الوطني غير مسبوقة فهاد المؤسسة الحيوية. الحموشي دابا كيكول امولى نوبة. وفيمن غادية تجي الدقة غدا