الباحث اگنوش في رد على تخربيقة البرنوصي اللي كالت الملك يعين اخنوش فبلاصة بنكيران": في هاذ البلاد كل واحد معروف بشطحتو والدستور راه الدستور خاص احترامو !

عبد اللطيف اكنوش استاذ باحث جامعة الحسن الاول سطات ///
نشر الباحث عبد اللطيف اگنوش استاذ في جامعة الحسن الاول تدوينة ردا على تصريحات نادية البرنوصي ل"تيل كيل". هذه التدوينة نشرها على صفحته على الفايسبوك توردها "كود" كاملة
واحد المجلة من المجلات =تيل كيل= قدمات للقراء ديالها السيدة "نادية البرنوصي"، بأنها "خبيرة في القانون الدستوري" بحكم أنها "رئيسة شي أكاديمية ديال القانون الدستوري"، وقدماتها على أنها كانت ضمن اللجنة للي "أعدت دستور 2011″…ترجمو نتوما بأن للي قالتو السيدة صحيح، بحال القرآن الكريم…
غير واحد القضية الله يجازيكوم بيخير..راه مللي كانتكللمو في القانون ولا في شي علم آخر، راه خوكوم داير بحال شي طوبيس…ماعممرك تغمق عليا ب"حجة السلطة"…عطيني ديما "سلطة الحجة" ولا غببر عليا زلافتك…راني كانعرف، وبزااف ديال الحرايفية كايعرفو كيفاش بنادم للي "خوووورزي كبييير" كايولي بين عشية وضحاها، رئيس ديال "شي أكاديمية"، وكا يولي "عضو في لجنة صياغة الدستور"..هاذ الحوايج ماكاتلعبش فيها "الكفاءة والخبرة" ديال بالصصح، عندنا المعيار الوحيد للي معمول بيه هو "الولاء" ولا شيء غير "الولاء"…سددينا..لأن في هاذ البلاد كل واحد معروف بشطحتو…
سبب نزول هاذ الكلام، هو أن السيدة، وللي بالمناسبة كان الوالد ديالها الله يرحمو صاحبي بكريييي، قالت بللي "إيلى ابن كيران ماقدرش يكوون حكومتو، يمكن للماليك يعييط على سي عزيز أخنوش ويعطيه إمكانية تكوين الحكومة"…علاش آ لالة؟ وغير ب37 مقعد؟؟…قالت ليك لأنه إيلى عطا هاذ الإمكانية "للبام، الشارع ماغاديش يعجبو الحال"، مع أن المنطق في القانون الدستوري، هو أنه في حالة تعذر جمع أغلبية من طرف الحزب للي جا اللول في الانتخابات، رئيس الدولة كا يعييط على الحزب اللي جا الثاني في الانتخابات، يعني "البام" ماشي أخنوش…سواء الشارع عجبو الحال، ولا ماعجبوش الحال..علاه هاذا اللعب؟؟؟ الشارع مال دين مو؟؟؟ القواعد الدستورية وروح هاذ القواعد صوت عليها هاذ الشارع بكررو، إيلى ماعجبوش الحال، كاينة المسويطة…
ثم آشنو واقع دابا؟؟؟ بالنسبة ليا شخصيا ماواقع والو…وغادين الناس يتوصلو لحل هاذ المهزلة اليوم ولا غدا حينت رخاها الله في هاذ البلاد، وابن كيران غادي يكوون حكومتو، وللي كاري حنكو غادي يكون كراه غير فابور..يا الله تصصبببي آ "الخبيرة ديال الولاء"…