حكومة فاشلة غريبة تاخد القرار وتوقفو: الخبر الوحيد اللي يمكن جابو ابن عرفة فخرجتو الخايبة هو تأجيل تنفيد تعويم الدرهم وهاد الصباح السوق السودا ما على بالهاش كلامو

ابن عرفة العدالة والتنمية سعد الدين العثماني ديما فاشل فخروجو الاعلامي فمواقفو. البارح داز ف"دوزيم" و"الاولى" وكان كعادته غير مقنع غير موفق. يمكن الخبر الوحيد اللي قالو البارح هو الاعلان عن وقف قرار تعويم الدرهم.
هاد الشي كان بانت مؤشراتو بعد تأجيل الندوة الصحافية لوالي بنك المغرب.
هاد التأخير عن الإعلان الرسمي عن بدء الشروع في عملية تعويم الدرهم، قال ابن عرفة٬ باللي مرتبطة بانتظار صدور نص تنظيمي من قبل الحكومة، مضيفا أن القرار سيعلن عنه في الوقت المناسب، وذلك بعد إكمال دراسة أخيرة تنجز حاليا حول هذا الموضوع.
هادا اكبر تخبط لهاد الحكومة. تعلن القرار وباقية ما موجداش ليه. كيفاش قرار بحال هادا ما شرحوهش للناس ما وضحوهش وخلقو حالة فالسوق. دابا كيجي وهو كيعلن عن التأجيل ديال العملية كلها ان "أن قرار التوجه إلى صرف مرن للدرهم، هو قرار سيتخذ من قبل الحكومة، مشيرا إلى أن هذا القرار الذي انطلقت دراسته منذ سنة 2005، لن يكون تعويما للدرهم، بل سيكون تحريرا لصرفه بشكل مرن في حدود 2,5 بالمائة على عكس 0,3 بالمائة المعمول به في صرف الدرهم الثابت المطبق الآن".
حكومة فاشلة فتدبير لا السياسة النقدية لا السياسة الاقتصادية لا السياسة الاجتماعية. فشلات فالحسيمة فشلات فتعويم الدرهم
صباح اليوم الاحد وكون كان رئيس حكومة محترم وكلامو كيديو عليه ما غاديش يصبح الاورو داير بحال الثمن البارح. فالصباح كيف عاينت "كود" فالسوق السوداء اي 11 درهم و30 سنتيم والحال ان ثمنو فنفس السوق كان ب10 دراهم و85 سنتيم. ما تغير والو ما تبدل والو.