شي مغاربة حماقو. گاليك علاش "جون افريك" دير غلافها "الارهاب. تزادو فالمغرب" مع الراية. واش ارهابيو برشلونة من المريخ راهم مغاربة بغيتو ولا كرهتو وهاديك المجلة راها ناطقة باسم المغرب: قراو تعرفو

نايضة قيامة هاد الايام على غلاف "جون افريك" الاخير =من 27 غشت الى 2 شتنبر= والسبب: العنوان" ارهاب. تزادو فالمغرب" مع صورة 10 الارهابيين ديال كاتالونيا وفالخلفية الراية المغربية وهاد الجملة "تزادو فقلب المغرب. تراديكاليزاو فاوربا. استقطباتهم داعش: من مريرت الى برشلونة تحقيق حول جنود قتالة ديال الجهاد".
الصداع دار كلشي علاش الراية المغربية وعلاش كلمة ارهاب و"تزادو فالمغرب" بالخضر والخلفية الحمرا =دم والراية المغربية". هاد النقاش ممكن يكون ولكن يولي مهيمن وكلشي باغي يبين باللي كيبغي المغرب بزاف وخايف على صورتو هادي حاجة خايبة. هاد الناس فئات. كاين اللي عزيز عليه صورة بلادو وكاين الانتهازي اللي كيسيء لبلادو بفضايحو بخدمتو المشوهة وفهاد المناسبات كيلعب دور البطولة بهاد الوطنية الشوفينية احيانا.
هاد الارهابيين راهم مغاربة كلهم من المغرب وماشي غير هوما حتى الارهابي اللي نحر شي فنلدنيين مغربي ويالله ايطاليا طردات 3 الائمة مغاربة. باحث ففرنسا تحدث عن وجود شي 70 بالمائة من العمليات الارهابية اللي ضربات اوربا اخيرا مغاربة الاصل.
فخلية برشلونة واخا ما عندهمش علاقة بالمغرب والمجلة وضحاتها فالغلاف "ولاو دواعش فاوربا واستقطباتهم تماك" ولكن راه عندهم الجنسية المغربية.
المضمون ديال المقال عادي جدا. ربورطاج من مريرت على شي عائلات ديال خلية برشلونة ما فيهش حديث عن المغرب كارض للارهاب. العدد نفسو وهادا مثير فيه افتتاحية ديال فرانسوا سودان رئيس التحرير على خطاب الملك فثورة الملك والشعب كينوه بيه وكيدافع عليه وفيه حوار مع وزير الخارجية والتعاون ناصر بوريطة واخد راحتو ودوز اللي بغى يدوز.