السياحة المغربية: واش بوم-بوم ديال ريدوان غادي ترد المغرب أجمل بلد فالعالم؟

—

المنتج العالمي "ريدوان" خرج اغنية جديدة سميتها "بوم بوم" مع "دادي يانكي" مول داك "ديسباسيتو" دوميغد و الرابور المغربي "فرينش مونطانا" لي بينو وبين الراب غي الخير والإحسان و واحد السيدة مقادة كتشعل عندها كولشي إلا الصوت، سميتها "دينا جان" و فأقل من 24 ساعة كانت هاد الأغنية وصلات فيوتوب لكثر من 3 ديال المليون مشاهدة. الفيدييو كليب ديالها تصور علاين كامل فالمغرب، فمراكش، شفشاون، تطوان، والصحراء. حيت ريدوان بغا زعما يدير الإشهار للثقافة
المغربية وللمؤهلات السياحية ديال البلاد.

معلوم بحال هاد المبادرات مايمكلنا الا نرحبو بيهوم ونشجعوهوم حيت كيف ماكان الحال بعدا هادو ناس كايحاولو يديرو شي لعبة و يعاونو بداكش لي كيعرفو ليه، ولكن واش هادشي كافي باش يهز بقطاع السياحة لي كيحتضر مسكين ويرد المغرب فعلا أجمل بلد فالعالم؟ بيانسور لا.

نقدرو نسوقو راسنا للبراني على اساس عندنا طبيعة واعرة وديفيرسيفيي، ونوريوه التصاور ديال اقشور و أوزود و البحورة ديال امسوان وسيدي افني و نعطيوه يتذوق الطبخ المغربي بأنواعه و نقولوليه راحنا غنديرو TGV و غنزيدو نبنيو لوطوروطات و نديوه حتى لفين تصور Game of Thrones… اوا؟ ومن بعد فاش يجي هاد البراني ويلقا بلي لا بغا يمشي غي من كازا ل الصويرة بالكار خاصو يتزاحم مع بنادم لي مامدوشش من نهار مات الحسن الثاني وخاصو يجمع رزقو عندو حيت لا رخف دقيقة غيخدموه، و فاش يبغي يمشي يعوم هو وصاحبتو فالبحر خاصو يدي معاه الكارد-كورا حيت لا فلتاتلها بزولة وحدة غيشقموها المكابيت، ولا جاتو البولة خاصو يحبسها ولا يديرها فسروالو حيت عندنا شي خمسة ديال الطواليطات عمومية فالمغرب كامل و هادوك نيت متدخلهومش واخا يكونو تابعينك بسيف من قوت معفونين وكيجيبو التقيا، وهادشي بلا منهدرو على الأثمنة الباهضة لي تخلي الكاوري يمشي لسان-تروبيه ومايدوزش العطلة ديالو هنا، وعلى السعاية لي كل ما غيزيد جوج خلفات غيطلبوليه "صون ديغام مسيو بوغ صوانيي مالاد" وفيديهوم شهادة طبية باش زعما يتيقهوم، وعلى لوطيلات لي فحالة مزرية، كتنعس فيهوم مزاحم مع سراق الزيت (معلوم مكنهدرش على المامونية والكينزي، كنهدر على بلايص غيمشي ليهوم الكاوري العادي لي حازق بحالنا ولي بنفس الثمن ولاقل يمكنلو يتبرع فشي اوبيرج مجهزة مقادة فسبانيا).

المغرب فيه السياحة ماشي مافيهش، ولكن النوعين لي فيه ولي يقدر بصح يقول بلي كيدخل منهوم
الكرمومة الصحيحة هما السياحة الجنسية والحشيشية، اللولة كتضم القحاب والبز(البيدوفيليا) والتانية فيها الكماية والتبزنيس. اما داك الهدرة ديال الرمال والجبال والبحور والسياحة العائلية غي بلاش! حيت شخصيا عمرني الى يومينا هذا ماشفت سعودي جار مرتو وولادو لأكادير باش يتنزهو ولا إماراتي جاي لطنجة باش يشوف فين كان محمد شكري كيقسي الخبز الحافي.