الحاج الفزازي و عيالاتو: المشكل هو هاد المجتمع المقود فين عايشين لي مخلطنا مع ماركات بحال المفترس ديال الفزازي والمكلخة ديال حنان

كتسركل هاد ليامات فيدييو ديال واحد البنت (حنان)، كتتاهم فيه الشيخ الفيزازي بلي ضحك عليها و دخل بها بلا عقد ديال الزواج، و دارليها كورطاج كاع.
معلوم الشيخ المحترم حتى هو دار فيدييو فين كيقارن هادشي لي وقعليه بشنو وقع ل الرسول صلى الله عليه والسلم، وفين كيفسر لينا بلي هي لي تاصلات بيه اللولة، حيت كان ضاربها جن يهودي والشيخ بصيفتو "التيرميناتور" ديال الجنون قبل ينقدها (معلوم نقدرو نفهمو هنا بلي الشيخ خرج الجن ودخل هو) وبغى يعلمها تصلي وكفاش تركع وتسجد، حيت مكانتش حسب مقال كتعرف (واخا السيدة باينة فيها كتعطي لركيع سبعة لزيرو).
دابا واش غنبقاو نحللو فالأقوال ديال البنت و ديال الفزازي باش نعرفو شكون لي كيقول الحق وشكون لي طالقها؟؟ لا! حيت المشكل ماشي هو هذا! المشكل هو هاد المجتمع المقود فين عايشين لي مخلطنا مع ماركات بحال هاد المفترس ديال الفزازي وهاد المكلخة ديال حنان، حيت مافيها شك هاد السيد غي غادي وكيجمع فالعيالات، واش بورقة ولا جوج ولا بلاش هادو غي تفاصيل، كون كان عندنا قانون واضح كيمنع التعدد مكانش هاد الداعية غيتقدا زوجة كل شهر، وفجهة خرا كون مكانش عندنا عيالات ملهوفات على الزواج مكانش غيلقا ميتقدا.
فالفيديو لي دارت هي كتقول فيه بفمها بلي سيمانة من بعد مهدرو قررو يتزوجو، واش اعباد الله بنادم غي باش يشري تيليفون وكيدوز كتر من شهر كيقارن وكيسول وكيقلب وعاد كيختار، وهادو عندهوم "الفاست-جواج"، معلوم مغايزدقش! هادشي طبعا بلا منهدرو على الفرق ديال السن، هي عندها 18 وهو بحفايدو، وبلا منهدرو على السمعة ديال الشيخ، لي من التفركيع، للحبس ، لحب سيدنا والعيالات، لمؤثر فايسبوكي وصارع للجن رسمي. كيبانلي اي وحدة بعقلها وعاطية قيمة لراسها غتشوف هادشي غتهز جلابتها وتهرب. واخا ، نقولو السيدة يائسة وبائسة وعندها ظروف، ولكن اختي ملي جابك لدار ففصالة بيرو وما سنا معاك حتى ورقة ، وبقا كيطل عليك ساعة فالنهار كيجي فيها واكل المقويات فهمي راسك وجري.
من غير هادشي كامل، هاد الحادثة راها رقم مليون ديال الإغتصاب والنصب من أجل الجنس بإسم صرع الجن والرقية الشرعية فالمغرب ف 2017، غي هادي حيت فيها شيخ "سوبير سطار" دارت ضجة اما راهوم الشيوخ بالألاف كيستاغلو الكلاخ ديال الناس وبالظبط ديال بناتهوم باش ينكحوهوم مقابل يداويوهوم، شلا اغتصابات تدارو بإسم: "باش يخرج هو خاص ندخل انا". خاص تدار شي حملة توعوية فالقرى وحتى فالمدن، عالله نصوفيو شي وحدات و بشوية بشوية تنقارض هاد الممارسة ديال القرون الوسطى.