يوميات ابيدجان. صحافة الكوت ديفوار رفعات الايقاع اكثر من البارح: الجماعة =الفيلة= تغلب السبع ويالله يا فيلة المغرب خاصو يطيح وبغينا رباح ولا بلاش

الصحف الايفوارية الورقية الرياضية طبعا ما كاينة هدرة غير على ماتش غدا. ماتش ماشي عادي اكثر من ذلك. تهييج شعب باكمله. الراديو التلفزيون المواقع الاخبارية المحلية والصحف الورقية. يومية "سوبير سبور" كتبت على صفحتها الاولى "الفيلة. بغينا رجالة ضد المغرب. ثم اضافت "الرباح ولا والو" كما نقلت تصريحا لزاها وعد بالقيام بمباراة جيدة.
في نفس الصفحة تصريحان الاول لرونار فيه "غاديين نكونو فرقة قوية" ويلموت "نهاية خاصنا نربحوها". اليومية نفسها اوضحت ان جمعية مشجعي الفيلة اطلقت شعارات منذ ايام "لنا روسيا" وان 29 الف تذكرة تلاحت فالسوق سالات تقريبا. يعني ان التيران اللي كيهز 35 الف جمهور غادي يكون عامر. كما نقلت اليومية في مقال تفصيلي في صفحتها الداخلية ان هاد الماتش كيلعب بمصير مدرب الفيلة: اما يهزوه على كتاف ولا يجريو عليه. كما تحدثت عن حالة حمزة مينديل لاعب المنتخب المغربي اللي خلى عائلتو مقسمة بين دعم الاسود او الفيلة لانه من ابوين. امو مغربية وبوه ايفواري. كل واحد كيشجع دولتو.
يومية "لوسبور" اختارت عنوان "يالله يا فيلة" عنوان صفحتها الرئيسية. حصصتها لاخر اخبار الفيلة واخر الاستعدادات وركزت على المورال اللي مزيان لهاد المنتخب اللي حيح فهاد السنوات العشر الاخيرة على الساحة الافريقية.
لكن احسن تلخيص لهاد المواجهة هو الاشهار التسويقي للمباراة اللي كتبين فيلة فالاول واسد وحيد ومن بعد يتحدثو على المباراة. قناة راديو تلفزيون الكوت ديفوار هي مولات هاد السبوت. كيقول كلشي. الاسود وحيدين والفيلة مجموعين والجماعة تغلب السبع