لجواهري قال غير نص الحقيقة على تعويم الدرهم. تجنب غضبتو وقال "مستعدين لاي وقت ف2018 ندوزو لنظام الصرف المرن

عبد اللطيف لجواهري والي بنك المغرب ما قالش كلشي الحقيقة على قضية تعويم الدرهم او كيف سماه "تغيير نظام الصرف التابث الى نظام الصرف المرن" ما قالش على الغضبة ديالو على شمتة هاد الحكومة ليه ولا على كيفاش تصرف معاه وزير المالية والاقتصاد اللي تخلى عليه.
لجواهري ذكر فندوة صحافية اليوم الثلاثاء انه كان خاص هاد التغيير يكون ف2017 وانه تآجل وعطى تبريرات ما شاداش "تأسيس الحكومة" اللي طلبات شوية الوقت. كيفاش تطلب وقت وكلشي كان موجود ووزير المالية والاقتصاد ما تغيرش وحتى الحكومة بقات عند نفس الحزب.
الجواهري قال باللي كلشي فوق الطاولة اليوم وانو دار اجتماع مع الابناك فنونبر. هاد الابناك حتى هما لعبو معاه لعب خايب باش كان تم الاعلان على "تعويم الدرهم".
الجواهري كيطالب باللي هاد الشي يوقع فاقرب وقت ممكن وانو مستعد يدير اللي بغات الحكومة. باش يعطي لموقفو قوة ذكر باللي صندوق النقد الدولي قال فشهر نونبر الاخير ان هاد القرار =تعويم الدرهم= غادي يكون مفيد للصادرات المغربية "اصلاح يدعم تنافسية المغرب بالنسبة لصادراته" كما اكد والي بنك المغرب.