نفس الأسطوانة تتكرر في الأقاليم الجنوبية والصحراء ولا من معتبر؛ ذات السياسة وبنفس الطريقة وحتى الأشخاص نفسهم لي كيجيو ويحتاكرو المشهد السياسي في ثوب ماهو ثقافي وفني ورياضي، وهاد المرة "لحاق الصحراوية" في نسخته الرابعة والمنظم من طرف جمعية "خليج الصحراء" بالداخلة، لي هو لحاق دون معنى ودون أهداف وما عرفناش علاش كيدار، وتحشد له جهات كبيرة الدعم كحالة المكتب الشريف للفوسفاط وولاية جهة الداخلة وادي الذهب ولارام وغيرها. اللحاق كيقصي ساكنة المنطقة والمرأة الصحراوية من التنظيم ولا كيرجعها فوكلور٬ على غرار السنوات الفارطة، ويستل منهم هويتهم دون وجه حق من خلال تقمص نساء مدن الشمال لدور المرأة الصحراوية و تلبسهم "الملحفة" قصد الضحك على الرأي العام الوطني، أما المحلي راه فايق وعايق بهاد النوع من الممارسات التي تسيء للصحراء وتسيء للمغرب أمام العالم أجمع في وقت كاينة ناس في الضفة الأخرى تتنازع معنا على الشرعية، وتتحين أرباع الفرص لتوجيه ضربات للوحدة الترابية للمملكة. الملتقيات والمنتديات والمهرجانات وغيرو سواء كانت محلية أو وطنية أو دولية التي تنظم في الصحراء وجب أن تمنح فيها دفة القيادة فيها للصحراويين ناس المنطقة وأهلها والعارفين بخباياها وهذا هو الخطأ اللي كنديرو وكنكرو بلا موعظة. ناس الصحراء خاصهم يقودو ماشي نجيبو ليهم نساء كل امرأة فيهم دايرة صاك بخمسة آلالاف درهم على كتفها، ماشي نجيلو ليهوم البراني ونحشدو ليه راس المال باش يدير نشاط ايا كان نوعو ويديرو رحلات استجمام على ظهر المال العام. هاد السنة كاينة مفارقة كبيرة كتوضح الفوارق ما بينا وبين خصوص الوحدة الترابية للمملكة، فبدءا من يوم الجمعة مناصرين البوليساريو دايرين حملة ديال الفيديوهات على مواقع التواصل الإجتماعي بكل اللغات بالعربية والفرنسية والإنجليزية والإيطالية والإسبانية وزيد وزيد، هاد الحملة انخرطو فيها الدراري الصغار والشباب والشيوخ من الجنسين يطالبون فيها بوقف "استغلال الثروات الطبيعية" في الصحراء. هاد الخطوة دارت بزيرو دينار جزائري وغزاو بيها العالم ووصلو رسالتهوم، وعكس ذلك حنا فالمغرب والداخلة دايرين لحاق رياضي لا يغني ولايسمن من جوع ما عندو حتى معنى وزايدينها بناس ما كتعرفش الصحراء ولا المنطقة ولا اللهجة، فبحال هاد الوقت خاصنا نكونو مستعدين للمقارعة مع دنو شهر ابريل لي كنعرفو كلنا شنو كيوقع فيه، خاصنا نحشدو الأغلبية الصحراوية الوحدوية ونفسحو أمام المجال باش تعبر حتى هي عن مواقفها ومبادئها التي تتسق والوحدة الترابية للمملكة وتسمع صوتها للعالم أجمع. الصحراء راه ماشي "خليج" بحال اسم الجمعية، يجي البراني ويدي معاه الدعم بملايين الدراهم لأنشطة فارغة المحتوى لا تفيد المغرب في شيء، الصحراء راه للناس الوحدوية لي باغية تخدم بلادها وما لاقياش الفرصة المحتكرة من طرف جهات ولات أسمائها محفوظة عن ظهر قلب. بدلو الكمامر لي كتجيبو لهاد المنطقة وخليو الناس تخدم راه عيات وقتلتو فيها حلم خدمة للوطن. راه ما يمكنش دافع على قضايا عادلة للمغرب ب"شانيل". ما يمكنش تعولو على ليلى اوعشي اللي ورا هاد التظاهرة ومن بعد تزيدو تكرهونا فيكم وتعطيوها "كرانس مونتانا" تكلف بالتواصل. الوالي خاصو يعرف غير كيخربق وراه خاصو يمشي فحالو باش وصلو سن التقاعد خاصو يجمع حوايجو ويجيبو واحد عندو ابداع فالدفاع عن الصحراء ماشي بليلى اوعشي راه بحالها وتواجد بحالها كيقوي البوليساريو كيقوي التيار الانفصالي
