يقدر يكون الواحد جاهل مكلخ وطني كثر من القياس بلا أخلاق ولكن صعيب يوصل لمرحلة الشماتة فموت العسكر ديال الجزائر بسباب حادثة سقوط الطائرة لي كانت هازاهم مع ناس البوليزاريو

يقدر يكون الواحد جاهل، مكلخ، وطني كثر من القياس، بلا أخلاق، ولكن صعيب يوصل لمرحلة الشماتة فموت العسكر ديال الجزائر بسباب حادثة سقوط الطائرة لي كانت هازاهم رفقة بعض البوليزاريو، غير هو فهاد البلاد عندنا الكلاخ كثير والتسابق على اظهار الوطنية المدرحة وشفنا عدة منشورات ديال ناس فرحانين بموت دزايرين غير حيت عسكر، ونساو أنهم شباب خلاو أمهات كيبكيو ومألمين وخلاو عائلات مصدومة، لي مكاينش فرق بينهم وبين عائلاتنا وخصوصا الجزائريين راه حنا وياهم كنس واحد ، وعندنا تاريخ مشترك ودماء مشتركة والمغاربة ساهمو بمالهم ودمائهم فحرب التحرير الجزائرية.
راه حتى دوك 26 ديال البوليزاريو لي ماتو معند تاواحد الحق بانه يتشفى فيهم ، هادوك راهم مغاربة قبل مايكونو بوليزاريو والوطن غفور رحيم ، وفوقاش مابغاو يرجعو راه كيدخلو للبلاد معززين مكرمين وكيرجعو كمواطنين مغاربة فاقو من الگلبة ، غير هو الموشكيل هو هاد المگلوبين لي معانا هنا وباغين يبينو راسهم مغاربة بزاف كثر من لقياس ، مع هاد الحمى ديال الوطنية لي ضاربة بنادم هاد ليام كولشي بغا الحرب والقصف ويقتل العدو باش يكسر الملل ، بانو عندنا أشباه بشر كيتشفاو فالموتى ، بل كاين كاع لي عاتب على العثماني أنه عزى الشعب الجزائري فموتاه.
هاد الوطنية الزايدة عند شي وحدين راه ماشي شي حاجة زينة وخاصهم يفتاخرو بيها ، راها غير تعصب ناتج على قلة الوعي والجهل ، راه مكاينش الفرق بين الوطني المتعصب والإسلامي المتشدد واليساري المتطرف ، حيت التعصب بصفة عامة كيلغي المنطق من الدماغ وكيخلي مولاه يدير حاجات خارجين المنطق ، فيناهي الوطنية فأنك تشمت فموتى حادثة ديال الطيران ، ولادهم وواليديهم كيبكيو عليهم ونتا فرحان ، راه حنا ماشي فحالة حرب مع الشعب الجزائري ، وراه كيما الجزائريين متضررين من نظامهم حتى حنا كذلك متضررين من نفس النظام(هم)، وأي كائن عاقل راه غادي يفرق بين النظام والمواقف ديالو وبين الشعب الجزائري الشقيق