المغرب لاعب كبير فشمال افريقيا. الجزائر تالفة باش هرب منها ملف مالي وتجاوزها ملف ليبيا. بوريطة باغي يدخل للتاريخ باحياء اتفاقية الصخيرات وجمع كلشي وفرانسا داعمانا والامارات واحلة مع “رحيل” حفتر

اجتماع مهم بزاف تعقد البارح فالرباط كيهم ملف لعب فيه المغرب بزاف وهو الملف الليبي. ملف معقد غاية التعقيد وبعد اتفاق الصخيرات اللي وقعو عليه ليبيو الغرب وعارضات بنودو حينها ليبيا الشرق =بنغازي للي شاداها المجلس العسكري الاعلى بقيادة الماريشال حفتر وبدعم كلي للاماراتيين.
دابا كلشي كيتحرك بسرعة. رحيل الجينرال حفنتر اللي شي كيقول ودع وشي كيقول مات سريريا ففرنسا٬ خلى المغرب يدوز لهاد السرعة. كان اجتماع مهم بزاف فالاليزي بين الملك محمد السادس رفقة وزير الخارجية ناصر بوريطة ومستشار الملك الهمة مع الرئيس الفرنسي ماكرون قبل اسبوعين. اجتماع كيف اشارت “كود” حينها ان الملف الليبي كان فيه مهم بزاف ويمكن اهم ملف تناقش.
المغرب تلقى الدعم من باريس باش يحيي اتفاق الصخيرات وممكن كاع يدير فيه تعديلات.
البارح وزير الخارجية اكد هاد الشي “اتفاق الصخيرات الموقع بين الفرقاء السياسيين في ليبيا، يشكل اليوم الأرضية الوحيدة التي يجتمع حولها كافة الليبيين” واضاف فلقاء صحافي بعد لقاء مع رئيس مجلس النواب الليبي عقيلة صالح، “أن اتفاق الصخيرات هو اتفاق انتقالي يحتاج إلى تكييفه مع مختلف التغيرات والتطورات ومع آراء كافة الأطراف الليبية، مؤكدا على ضرورة الإسراع في استكمال المرحلة الانتقالية والمرور إلى الانتخابات البلدية والنيابية والرئاسية، التي تتيح إفراز المؤسسات الشرعية.
طبعا ها الملف متبعو شخصيا الملك بل كلشي مكلف بيه. الفكرة هي استقرار ليبيا حقاش فيها استقرار المنطقة وفنفس الوقت ضمان وحدتها.
المغرب كيشوف باللي حل هاد الملف كيرتاكز على “ان “حل الأزمة هو بيد الليبيين فقط، على اعتبار أنهم الأدرى بمصلحة ليبيا”، وأن المغرب منخرط في إطار المجهودات الأممية لرامية إلى بلوغ تسوية سياسية متفق بشأنها من قبل جميع الأطراف وان “مصلحة المغرب الوحيدة هي استقرار هذا البلد المغاربي الشقيق”
هنا كيوجد رسائل تلميح لدور الامارات او قطر او غيرها. بغيتو تلعبو لعبو بعيد منا. امن ليبيا من امن الدول المغاربية. كيقول للجزائر ما يمكنش لشي حد يضمن استقرار المنطقة الا حنا وخاصنا نتعاونا. تبقاي ضربي فالمغرب من التحت عبر البوليساريو او غيرها راه خطر عليه.
لكن واش المغرب ضمن حضور كاع الليبيين واستعدادهم لاتفاق معدل او جديد للصخيرات؟ رئيس مجلس النواب الليبي عقيلة صالح كان واضح فهاد النقطة عندما قال “اتفاق الصخيرات يعد الإطار الكفيل بتسوية الخلاف السياسي بين فرقاء الأزمة في ليبيا” اكثر من ذلك عبر عن استعدادو باش تدخل تعديلات فهاد الاتفاق “المرحلة الراهنة والظروف السياسية التي تمر بها البلاد تملي ضرورة إدخال بعض التعديلات على الاتفاق لجعله يستجيب لتطلعات كافة الأطراف”
هو كيقول هاد التعديلات بسيطة وكتهم “تعديل تركيبة المجلس الرئاسي من تسعة أشخاص إلى ثلاثة أشخاص على اعتبار أن ليبيا تنقسم إلى ثلاثة أقاليم، مضيفا أن هذا المجلس الذي يتولى السلطة التنفيذية ويحل مكان رئيس الجمهورية ويكلف رئيس الوزراء ويشكل الحكومة سيمكن في مرحلة لاحقة من توحيد مؤسسات البلاد”
وهاد المسؤول مزروب وباغي حل سريع. لكن اش كيقول المجلس الاعلى اللبيبي للدولة خالد المشري؟
المشري شكر المغرب بزاف حقاش “الازمة الليببية التي طال أمدها كان المغرب هو المثال الحقيقي و الأكثر فيما يتعلق بالتدخل الايجابي، حيث أن كثيرا من الدول الاقليمية وضعت في حساباتها الخاصة قبل حساب المصلحة الليبية، لكن في الحقيقة المغرب وفر كل الاجواء للليبيين لإجراء حوار شفاف و حقيقي نتج عنه فيما سبق اتفاق الصخيرات”.
كما اعتبران “اتفاق الصخيرات في بعض البنود يحتاج إلى تعديلات، المغرب تدخل من جديد”.
وختم “عتقد أننا جميعا مجلس الدولة و مجلس النواب متفقين على هذا، و الآن إخواننا المغاربة يساعدوننا فس تحقيق هذه الأمنيات و ترجمتها إلى واقع عملي و سنرى قريبا إنشاء الله خطوات حقيقية في هذا المجال”.
يعني مستعد للحوار ولاتفاق جديد او تعديل الاتفاق السابق للصخيرات.
هاد الشي كيبين باللي المغرب بدا وساطتو وكلشي قابل بيها. ايلى وقع شي اتفاق قريب وزير الخارجية والتعاون ناصر بوريطة غادي يدخل للتاريخ. ليبيا ملف معقد بزاف وامنها من امن المنطقة. المغرب غادي يولي قوة كبيرة فالمنطقة. ماشي عسكرية بل ديبلوماسية. هاد الشي مزيان لينا. خاصنا غير نلعبو بذكاء كبير حقاش قوى كبيرة ماديا او عسكريا كتشوف ولا تمسات مصالحها مشى اللي دار المغرب كلشي فالزيرو. دابا اللي كيتبع ليبيا بان ليه خاص اتفاق سريع حقاش حرب الخلافة عند جناح حفتر بدات فليبيا.