للأسف هاد المقاطعة ولات بحال شي واد حامل هابط من الجبل صعيب يوقف قبالتو بنادم أو غادي يديه ، دابا آشنو كتسنى من واحد تقلق حيت مدير سنطرال قال على المقاطعين خونة وفنفس الوقت كيعتابر أي واحد ممقاطعش خائن

بزاف ديال المسؤولين حكوميين نازلين عليهم المغاربة في المواقع الإجتماعية بالسبان والإنتقادات بسبب موقفهم من المقاطعة أو تصريحاتهم عليها، الموشكيل هاد المسؤولين المغاربة نيت لي نتاخبوهم وجوج مرات متتابعة ، وحتى المسؤولين لي كانو قبل المغاربة لي نتاخبوهم ، إذن فين كاين الموشكيل واش فهاد المسؤولين لي كيوصلو للمنصب وكيقلبو وجهم على الشعب( أصلا الشعب طلباتو كثيرة بزاف البعض منها منطقي ومستحق والبعض راه غير بنادم اغي يعيش فا وصافي)، السؤال إلى كانو المغاربة توحدو على كلمة وحدة لي هي المقاطعة وبزاف منهم قاطع ماشي كولشي طبعا، وملي المغاربة هاكة واعيين وحضريين كيما كيوصفو راسهم فالصفحات الفايسبوكية ، إذن شكون هاد المصمكين لي صوتوا على هاد الحكومة أو الحكومة لي قبلها ، وشكون هاد المغاربة لي وصلوا هاد المسؤولين لمراكز القرار ودابا كيتشكاو منهم .
واش هاد المسؤولين طاحو من السما أو حطهم شي حد ، أغلبهم الشعب لي وصلهم تما ، إذن فين كان وعي هاد الشعب وتحضره داك الساعة ، كيما المقاطعة بينات وعرات على إنتهازية البعض وتخلويض البعض الآخر ، وعلى فشل الحكومة فتدبير مثل هاد الخرجات ، فإنها أيضا بينات على أننا وسط شعب كيمشي مع الموجة وتابع جيلالة بالنافخ، وهاد المقاطعة ني تراه غير موجة خرى من الموجات الكثار لي مشا معاهم الشعب هادي عقود ، حيت كون بغاو يقاطعو شي منتوج غادي يقاطعو كولشي ماشي يستهدفو شركات معينة دون أخرى .
للأسف هاد المقاطعة ولات بحال شي واد حامل هابط من الجبل صعيب يوقف قبالتو بنادم أو غادي يديه ، دابا آشنو كتسنى من واحد تقلق حيت مدير سنطرال قال على المقاطعين خونة وفنفس الوقت كيعتابر أي واحد ممقاطعش خائن ، بل كاين لي وللى كيعتابر ولاد الشعب لي خدامين فسنطرال وافريقيا وسيدي علي اعداء وخونة للقضية ، وشحال من فيديو كاين فالأنترنيت ديال مغاربة كيضحكو على عمال هاد الشركات وكيطنزو عليهم أو كيضايقوهم فالعمل ديالهم ،آه من حقك تقاطع أي منتوج بغيتي ولكن ممنحقكش تدير السيبة وتضايق عباد الله وحتى هادو خاصهم يتعاقبو .