ماكنستاهلوش دوك صاماد: أمر محزن أنه كيفكر يخرج من المغرب بمرة و لكن كنفهمو حيث هاد المجتمع كيغلبك بالإحباط.. كيوصل واحد الوقت كاتلقا راسك غير كتبول ضد الريح و كتطلي كمارتك هيا اللولة

شحال هادي، كنت بارطاجيت ديك الڢيديو ديال دوك صاماد للي تايدوي فيها و وجهو مغلف بالفاصمات فواحد البرنامج ديال واحد القناة معروفة. التعليق للي كتبت عليها مكانش من غرضو نستهزء بيه، بالعكس، و لكن واخا هاكاك رسل ليا ميساج باش يعاتبني عليه. كعيت فاللول و بغيت نڭول ليه “سير تقود نڭول لي بغيت، وإلى ما عجبكش الحال بدل الحرفة”، و لكن فكرت جوج دقايق و لقيت فيا أنا لافوت حيث دماغي تأقلم بزاف مع ڭاع لخرا للي كيتكتب عليه، و ولا تيجيني عادي حتى أنا نخرا عليه بلاما نتسوق للضرر للي كيتسبب ليه فنفسيتو. مسحت داك المنشور و مابقيتش دويت عليه ڭاع، و حتى هو كان متفهم مني فسرت ليه شنو عنيت بالتعليق ديالي.
بزاف ديال الناس كيعيرو دوك صاماد، و منهم المتفتحين فكريا. كيعيرو شكلو، أفكارو، طريقة هضرتو و أي حاجة دار. شخصيا، ما كنستبعدش أبدا أنه فعلا تعرض للضرب بسبب خدمتو، حيث غير مني أنا و جبد: بزاف ديال الناس كيسولوني واش مكنخافش على سلامتي بسبب داك الشي للي كنڭول و كنتكتب. حيث واخا المغاربة فحاجة ماسة لأشخاص كتدوي على الطابوهات و كتدافع على الحريات الشخصية، مكيستحملوش يسمعوها من ناس حتى هي معنية بهاد الأمور. مكيتقبلوش الهدرة على الجنس إلا لا كانت جيا من شي باحث علوم اجتماع القضيب ديالو نشف و مابقاش عارف علاش كيدوي. مكيتصنتوش للمثليين الجنسيين، كيفضلو يسمعو للغيريين للي كيدافعو على المثلية. حرية المعتقد كتصدمهم، ولكن تيصفقو إلى دافع عليها إمام مسجد. و مني تيجي سيدنا رمضان، ماخاصكش تعترف بعدم الصوم حيث نتا ملحد و كتحس بالخنقة، ولكن خاصك تدير شويا ديال النفاق و تخبا ورا خطابات على اللائكية. إلى دويتي على هاد الشي حيث عندك تجربة كشخص مثلي، ملحد، متحرر جنسيا، إلخ… راه ماكتبانش شجاعة، بل اعتراف بالوسخ ديالك و كتولي جفاف للي جا يمسح فيك رجليه. كيشوفو فيك إنسان ضاسر خاصو يتربا، و ما بعيداش شي واحد سكران أولا مقرقب تبان ليه فالبلان و يفجر فيك العنف ديالو حيث بالنسبة ليه راك تتستاهل.
الهدرة على التربية الجنسية ماشي شي حاجة جديدة فالمغرب، غير هو كانت حكر على المجلات الفرنكوفونية للي كتستهدف قراء عندهم الإمكانيات المادية باش ينيكو بلاما يمشيو للحبس. دوك صاماد قرب التربية الجنسية للطبقات الاجتماعية للي محتاجة كثر تصالح مع الجنس. السيد راه ماشي مكلخ أولا ما قاريش — عارفة هاد الشي حيث اتجوبتو ف 2013 و لقيت فيه إنسان راسو عامر، راه فيه مايصور فليسات زوينين بأي حرفة بغا، ولكن اختار يوعي الناس. و عوض مانكافؤوه ولو غير بالاحترام و التساع، نهار و ماطال و حنا كنخراو عليه بالضحك فمواقع التواصل الاجتماعي.
أمر محزن أنه كيفكر يخرج من المغرب بمرة و لكن كنفهمو حيث هاد المجتمع كيغلبك بالإحباط. كيوصل واحد الوقت كاتلقا راسك غير كتبول ضد الريح و كتطلي كمارتك هيا اللولة، و كتڭول بينك و بين راسك “مالني على حالتي؟”