فضيحة “گلامور” و رهافة الرجولة المغربية

في سابقة من نوعها، اكتاشف الفتى المغربي أن الفتات المغربية بحالها بحالو عندها شهوة جنسية و كتخصر الهدرة و كتمارس العادة السرية و كتخاطر بسلامتها باش تطلعها و تضحك مع صحاباتها فالڭروبات السرية. الفضل كيرجع للتسريبات ديال المجموعة الفيسبوكية “گلامور” و للي خلعات بزاف الدراري و داروها سبة باش يفسرو الفشل ديالهم العاطفي. إلى ماجابوهاش زوينة و قارية و خدامة و مربية، فراه ماشي حيث ما عندهمش المؤهلات باش يقنعوها، المشكل الحقيقي بالنسبة ليهم هو أنه أصلا گاع الدريات عاهرات و السكرينات ديال “ڭلامور” هما الدليل.
الذكورة عندنا ما كيستوعبوش شحال قاسحة تكون بنت عايشة فالمغرب. كولشي حاضيك و داخل ليك فالمؤخرة ديالك فالشادة و الفادة، باغين يعرفو آش كتلبسي، و معامن مرافقة، و فاش خدامة، و معاش كتخرجي و تدخلي للدار، و كيفاش كتدوي، و شنو كتاكلي، و لحمك واش نقي فاش كتعراي فالحمام و و و … ويلا بينتي غير شوية ديال القحوب كيشدو الصف عليك، كلا واحد شاد قضيبو فيدو و كيتسنا نوبتو باش يبول فيك و يعاود لصحابو شحال نتي موسخة تفو. كولشي باغي يتأكد بللي غادي تخرجي من دار سيدك للي ولدك لدار سيدك للي غادي ينيكك بلا شوهة. و بينما تدوز هاد الصفقة، خاصك تگلسي فالدار و ما تديري والو و تبقاي تنقي فنيفك و ضفرانك بينما جا فارس الأحلام ولد سعيدة على حمارتو باش يعتقك من الملل.
كيتحكمو فالمظاهر و حتى الباطن باغين يسيطرو عليه، خاص البنت تكون نزيهة حتى فأفكارها و مايكونوش عندها شهوات ديال قلة الحيا. كيصحاب ليهم العيالات كينقيو العدس و كيغنيو الأمداح النبوية فاش كيتجمعو بيناتهم. راه حتى قبل لانترنيت كانت الهضرة كتدور على النيك و المسالك البولية، فالحماحم و الديور و القهاوي، بين الصحابات و الخواتات. دخلنا عليكم بالله فاش ضروكم هاد الدريات؟ بالعكس، خاص تفرحو حيث الخبرة الجنسية مؤشر ديال مستقبل زوجي زاهي. و لكن المغربي مسكين للي ما تايقش فرجولتو تيرفض أن نفس الفم للي تيمصو ليه يبوس ليه ولدو، تيبغي يتجوج بيها كانبوا و عفيفة و معقدة، و يمشي ينعس ورا ضهرها بالفلوس. تيصعب حياتو بتصنيفات تافهة: النساء للي كيستاهلو الجواج بوحدهم، و النساء ديال النيك بوحدهم. بحال داك الشي ديال شرع ربي و ما ملكت أيمانكم.
نصيحة للدريات: الإنسان الرزين كيتعايش مع الواقع ديالو كيفما هو، ماشي كيفما خاصو يكون. الواقع هو هاد البلاد عندها مشكل مقود مع الجنس و ما كتحتارمش السرية و خصوصيات الفرد. أصلا بلاما نوصلو للنيك غير إلى جارك حصل عليك شي حاجة راه يقدر يولي يهددك بيها، حيث كيصحاب ليه راسو ولات عندو سلطة عليك، حساك إلى كانت هاد الحاجة متعلقة بأكبر الطابوهات. إذن عزيزتي إلى بغيتي تشطحي بحالا ما كيشوف فيك تاشي واحد، كي خلاها المرحوم مارك تواين، خاصك تڭدي بيها و لا تعيشي حياتك بعيدا عن العلنية ديال لانترنيت.