سابقة فتاريخ الاسود. خسرو وكلشي صفق عليهم واللعابة كيشكرو الجمهور وانفانتينو ليهم: برافو عليكم

اليوم الاربعاء 20 يونيو 2018 تقصى المنتخب المغربي لكرة القدم من المونديال بعد هزيمة ثانية امام ابطال اوربا المنتخب البرتغالي. هدف سجله رونالدو في مباراة اقيمت بملعب “لوجينكي” بموسكو. التيران كان عامر. رونار مدرب الاسود كان عندو الحق باش قال باللي حسينا براسنا لاعبين فبلادنا. منير الكجوي تحدث على ما سماه “حنان وعطف الجمهور” وبدا متاثرا بهاد الهزيمة.
بالطبع هادي هزيمة ولكن المنتخب لعب ماتش واعر بزاف. حيح. بالاحصائيات. البرتغال ضربات كورة وحدة للشبكة دارها رونالدو ماركاها وكورة اخرى جبدها الكول. فيما المغرب غير بنعطية بوحدو زكل 4 الاهداف.
المنتخب فسابقة فتاريخ الاسود صفق عليهم الجمهور فالنهاية. شكرهم. نفس الثناء دارو رئيس الفيفا دجاني اينفانتيو اللي كال للعابة بعد ما سالى الماتش: برافو عليكم.
حتى فالندوة الصحافية شكر صحافيون اداء المنتخب.
بعد نهاية المباراة كان الجمهور ناشط مقلق. ناشط على ماتش “رفعو لينا الراس” كيف قال واحد ل”كود” ومقلق علي الماتش ديال ايران اللي زكلناه وقودها على مسيرة المنتخب فهاد المونديال.
الجمهور بقى يتسنى بزاف باش يخرج اللعابة اللي مشاو ديرك فمقر اقامتهم 500 كلمتر على موسكو يوجدو لاخر ماتش ضد اسبانيا فكالينيكراد يوم 25 يونيو