سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
وا خاي العنزي هادشي ديرو عندكم فمهرجان الملك عبد العزيز للإبل و يجي مزيان و يجي معاكم! ! حنا أغنية “شمس الحضارات” ماكاتشبهش لينا و لا لثقافتنا و لا لشنو بغينا لبلادنا
لادخلتي ليوتوب و كتبتي هاد الكلمات ” قصيدة مدح الملك عبد الله” غاتلقا عرام ديال القصايد كايمدحو الملوك ديال الخليج ! قصائد مدح ! قصائد رثاء ! لملوك و أمراء البيترول ! الشعر جزء مهم من الثقافة و الهوية ناس شبه الجزيرة العربية و هادشي من شحال هادي و كيما كانو جدودهم كاينظمو مسابقات فالشعر ! مازال لدابا المسابقات الشعرية عندهم آگوگو و كاتلقا تا الأمراء عندهم شعراء و كايرعاو الشعر و كايحضرو للمسابقات ديالو … و الاشعار اغلبها كاتتحول لأغاني جا الملك فيصل ! غايغنيو على فيصل مات فيصل ! غايغنيو على فيصل! ! طلع فهد ملك ! غايغنيو على فهد! مات فهد ! غايغنيو عليه ! طلع عبد الله غايغنيو عليه مات عبد الله غايغنيو عليه طلع سلمان غايغنيو عليه مات سلمان بعد عمر طويل غايغنيو عليه و شعر نيت! كايطيرو فالمدح و الرثاء ! و عندهم امراء و ضباط و ناس كبار فالدولة كايتعاطاو للشعر داكشي علاش النيفو طالع …داكشي ديال سوق عكاظ و كاين گاع فيهم لي كايتخادو و يغنيوهم مغنيين خليجيين مشهورين فحال نبيل شعيل و أحلام و ماجد المهندس و عندهم هاد الثقافة ديال المدح آفونصي و كايعطيوها صليااااا ! داكشي عندهم فثقافتهم و سوقهم هاداك ! حنا ثقافتنا مافيهاش هادشي ! حنا مختالفين على ناس شبه الجزيرة العربية ! غنانا بوحدو و نشاطنا بوحدو ! و تاحنا لاجيتينا للغنا فين يبانو الخوالجة ! عندنا العيوط و الحيدوس و الطقطوقة و گناوة و كانعرفو نغنيو و نشطو مزيان ! هادشي علاش فاش سمعت الأغنية لي دار مصعب العنزي ” شمس الحضارات” بقيت كانسول راسي ! آش هاد الأغنية ؟ و لمن موجهة ؟ واش للمغاربة و لا للخليجيين ! حيت لاكانت موجهة للمغاربة علاش مامستوحاتش من الثقافة و الهوية المغربية ؟ علاش الريتم خليجي و الدف خليجي و المغنيين خوالجة ؟ واش المغريبي صالح ولد المسكيني لي متكي فوق نادر ديال التبن فولاد البوزيري غايفهم دوك الكلمات و يحركو فيه شي حاجة ؟ و لا المغربية التايكة بنت بوسلهام لي ساكنة فعين السبع فاقت الصباح شوات السردين و هبطات هي وولادها لعين الذياب يتبحرو غايفهمو دوك الكلمات و الالحان و يشطحو عليهم ؟ و لا كانت موجهة للخوالجة علاش ؟ باش يبغيونا ؟ واش غايبغيونا بالأغاني زعما؟ مانظنش ! العلاقات بين الدول كاتبنى على المصالح أولا و أخيرا و هادشي لي بان مورا التصويت الاخير على الدول لي غاتستاضف كاس العالم و لي كان فيه المغرب كونطر ميريكان ! ثم أصلا أصلا آ خاي العنزي شكون هاد الدول المحترمة فألفين و تمنطاش لي كاتغني على الملوك و الرؤساء ديالها و تسميهم :” الزعيم” و ” القائد” و مثل هاد التسميات لي كاتلقاها فالدول لي كاتعتامد على داك le culte de la personnalité ! و كاتبغي تمارس البروباگاندا بالاغاني فحال الاتحاد السوفياتي يامات ستالين و الزايير ديال موبوتو سيسيسيكو و كوريا الشمالية ! وا خاي العنزي هادشي ديرو عندكم فمهرجان الملك عبد العزيز للإبل و يجي مزيان و يجي معاكم حنا دولة ختارت تشوف هوك جيهت لوروب و ختارت تكون دولة مؤسسات و حداثة و كدا كداشي ايوا علاش آ خاي مصعب باغي تآمبورطي لينا ثقافتكم فالخليج و تلصقها فينا ؟ حنا ماعندنا حرب ! مامنوضين گيررا ! مامشادين مع حد ! ماكارهين حد ! ملكنا محبوب ! باغين نبنيو بلاد حديثة ! دول مؤسسات يعيش فيها المواطن كمواطن محترم بكرامتو ! و البلاد ماكاتبناش بالأغاني و زطق زطق بق ! البلاد كاتبنى بالمعقول و المسؤولية و المحاسبة و حتى الظرفية الحالية لي كاتمر منها البلاد مامحتاجاش للاغاني !و راه الملك قالها بفمو فالخطاب البلاد محتاجة لي يخدم و يعاون و يعطي من وقتو و جهدو باش تزيد القدام.
