بنعرفة وشوهتو او كيفاش تكون فاشل وتجيب اللي يسبك يحسن ليك الصورة وتزيد تكفسها

بنعرفة وشوهتو. بغى يحسن صورتو زاد كفسها. خرجة صحافية خلاتو ضحكة وشوهة فشبيبة حزبو. اقالة بوسعيد ما فراسوش غير خطب الملك: هادي خارطة طريق…..
بنعرفة عارف راسو ما فيدوش. عارف لمغاربة ما كيحتارموهش. ايلى كانو اصلا فراسهم موجود. رئيس حكومة لا يهش ولا ينش. حضر ما يديها فيه حد. غاب ما رد ليه حد البال. هاد ليام الفرقة ديالو اللي جابها تحسن ليه صورتو هادي مرة واللي كانت كتسب فيه وفحزبو فحزب الحملة ضد حزبو قبل الانتخابات التشريعية الاخيرة٬ تزادت صورتو تشوهات. هاد السيد هو اللي كان على رأس شبيبة العود واسمه انور الزين وخوه هو اللي كيدير التواصل مع “سانترال ليتيار”
هاد التشوهات بانت فالاوانة الاخيرة وغادين نوضحوها ليكم ف”كود” من خلال عدة مؤشرات.
لقاء الشبيبة:
جا رئيس الحكومة اللي هو كذلك الامين العام لحزب العدالة والتنمية للقاء الشبيبة اللي غادي يختاتم اليوم فكازا٬ فافتتاح هاد الملتقى ترفعو شعارات تطالب بعودة بنكيران. باش ناسو يسكتوهم طلقو القرآن. يعني بنعرفة ما ماديهاش فيه حتى شبيبتو. باغيين عودة بنكيران باش يحسو بفخر الانتماء ماشي مع هادا اللي تبهدلو فيه. خرجة فاشلة بل شوه فيها
اقالة بوسعيد
باش خرج بيان الديوان الملكي حول اقالة وزير المالية والاقتصاد محمد بوسعيد من الحكومة اللي كيرأسها بنعرفة نيت٬ قال =البيان= باللي تشاور مع رئيس الحكومة= كيفما كيقول الدستور=. غير حتى حد ما صدق باللي رئيس حكومة بحال هادا ما فراسو والو غادي يكون فراسو على تمت اقالة بوسعيد. غادي يتم اخبارو باللي غادي يمشي وكفى. الصواب اللي فرضو الدستور وصافي.
خطاب الملك خارطة طريق
باش خطب الملك محمد السادس فالحسيمة خرج بنعرفة كاي سياسي ضعيف مشوه كيردد باللي الخطاب غادي يكون خارطة طريق للحكومة. فخرجاتو كرر هاد الشي. اييه وانت فينك فين برنامجك لاش كاين كاع.
السيد قال فحوار مع “ليكونوميست” “سنحترم التزاماتنا والآجال التي حددها الخطاب الملكي” واضاف “قمنا في اليوم الموالي للخطاب الملكي، بتعبئة كل الوزارات لإعداد خطة عمل واضحة ودقيقة، بالإضافة لخارطة طريق لمختلف الأوراش”. وقول لينا فين برنامجك ولاش انت فهاد المنصب كاع ايلى كنتي كطبق هاد الشي.
خرجات اعلامية فاشلة
رئيس حكومة فاشل ما وصلتش على دراعو للمنصب ودارت بيعة وشرية باش يتم التخلي على بنكيران اللي ربح الحزب بصاح فالانتخابات٬ ما يمكن يكون الا فاشل فتدبير تواصلو. جا ل”كلوب ليكونوميست” باش يقول باللي التفسيرات حول اقالة بوسعيد ماشي دقيقة ولا صحيحة. كلشي تسنى يطلق شي سكوب او معلومة ما دايراش. غير بنعرفة وفي بنبعرفة رد راه كلشي واضح فبيان الديوان الملكي. هاد الشي كيبين شخصيتو كيبين شكون رئيس حكومتنا. فاقد الشيء لا يعطيه.