انفراد. زبايل بنعرفة كثرات. واقف على هاد وزير فحكومتو فمنصب المالية وبعد ما اعتارض تم تعيين بنشعبون وكذب على لمغاربة فتويتر

زبايل رئيس الحكومة اللي جابوه فبلاصة بنكيران دون استحقاق غادية وتكثار. غاديين يوحلو فيه بزاف فاللخر. حقاش اللي كيوصل لشي منصب بلا استحقاق هادي هي النتيجة اللي محتمل جدا يسالي بيها الفيلم. بعد ما اثير ويثار عن اقالة او ابعاد الوزيرة كاتبة الدولة في الماء شرفات افيلال٬ كاين موضوع اخر بين فيه ضعفو لكبير.
وفق مصادر مطلعة ل”كود” فان رئيس الحكومة كان قبل بتعيين وزير الصناعة والاستثمار والتجارة مولاي حفيظ العلمي وزيرا للمالية والاقتصاد خلفا للوزير المقال محمد بوسعيد. وفق مصدر من قيادة العدالة والتنمية ل”كود” فان هاد التعيين تمت الموافقة عليه من قبل رئيس الحكومة واشر عليه. اي انه بقى فهاد المستوى. الدستور يقول ان رئيس الحكومة يقترح والملك يعين.
مصدر “كود” شدد على انه قد يكون المعني بالامر لم يوافق على اقتراحه للمنصب. طبعا عندو الحق. تنشر اتهام ليه وللوزير السابق للمالية بوسعيد بخصوص صفقة القرن ديال بيع شركتو “ساهام” بخصوص الغاء ضريبة تسجيل البيع. واخا ماشي هو المعني بيها بل الشركة الجنوب افريقية اللي خاصها تخلص. ثم قيل ان سبب اقالة بوسعيد عندها علاقة بالموضوع وتبين ان هاد الشي غير كذوب. لان الصفقة كيف نشرات “كود” قبل ايام تمت الموافقة عليها عند السلطات المختصة بالمغرب
هاد الشي اش كيعني؟ كلشي شاف اش كتب رئيس الحكومة بعد تعيين محمد بنشعبون وزيرا للمالية والاقتصاد. خرج بنعرفة وقال “لا علاقة للاغلبية بالموضوع. رئيس حزب الاحرار اقترح علي السيد بنشعبون بحكم ان الحقيبة تعود لحزبه وارسل سيرته الذاتية فبادرته باقتراحه على جلالة الملك الذي وافق وتفضل بالتعيين”.
ما قالش باللي وافق على تعيين شخص اخر ما تكلمش على كيفاش تم التعيين. دار غير اللي بان ليه مناسب.