العبث ديال بنعرفة متواصل: كيفاش رئيس حكومة يقاطع قناة عمومية؟ واش المشاهدين ديالها ماعندهمش الحق يعرفو اش غادي يقول؟

كما قالت “كود” قبل قليل فان العثماني قرر يمشي يدير لقاء خاص مع القنوات العمومية باش يشرح قرارات حكومته الى الشعب خصوصا بعد الغضب اللي تسببات فيه مثل هاد القضية د زيادة ساعة نهائيا.. اللقاء الخاص د رئيس الحكومة مع وسائل الاعلام العمومي ماعرمها كانت قبل بنكيران، هو اللي بدا بها ، ودارها بعد ايضا الغضب الشعبي اللي تسببات به بعض قرارات حكومته الاولى بجال تحرير سعر ليسانس و المازوط..لكن بنكيران كانت عندو بلاغة و قدرة على الاقناع و كايهضر الدارجة بطلاقة و باستعمال حجج تقنع جميع شرائح المجتمع والعثماني محال واش ينفعو هادشي..
المهم المثير هو ان اللقاء اللي غادي يدير العثماني مقتصر فقط على القناة الاولى و ميدي1، في حين دوزيم مامذكوراش ف البلاغ و هادي قضية عجيبة غريبة ثاني، كيف للمسؤول الحكومي الاول فالبلاد يستثني قناة عمومية من لقاء به…اولا ماشي من حقو، حيث تاهي قناة عمومية ومن حقها تستفاد من الظهور الاعلامي لرئيس الحكومة في مجال الاشهار و غيرو و ثانيا راه هي خدمة عمومية عندها مشاهدين ديالها ومن حقهم يشوفو السيد اش كايقول..
و فين الحق في الوصول الى المعلومة؟ واش السي العثماني ماعارفش ان مشاهدي دوزيم راه اكثر من مشاهدي القناة الاولى و ميدي1؟
هاد الاقصاء السبب ديالو ان العثماني كان غاضب على دوزيم حيث دارت تقرير على المقاطعة ديال بعض المنتوجات بحالها بحال اي وسيلة صحفية،و السيد ماعجبوش الحال و دار رسالة احتجاج، و اللي ماعجبوش اكثر هو تصويره ف مشهد وهو لايريد الجواب او التعليق على هاد الظاهرة..القناة دارت خدمتها وهو اعتبرها غير مهنية .
و ف العموم فان دوزيم وخصوصا قسم الاخبار فيها اللي كترأسو سميرة سيطايل من قديم عندو صراعات مع البيجيدي بسبب اتهامهم ليها بعدم الحياد او الاستقواء بجهات ف الدولة و السيدة كترد بلي هي مهنية وصافي وان الحزب بغا يسيطر على الاعلام و ينشر افكارو…و زاد تعمق هاد الصراع مع مقاطعتها الحالية من طرف بنعرفة وهو شيء غير معقول وداخل في العبثية..