بعيدا من التيران قريبا من كرة القدم. طنجاوة كيتنفسو الكرة قبل مقابلة الارجنتين والمغرب

بعيدا عن أجواء الملعب الصارمة، تبعا للإجراءات الامنية التي تسبق الاعداد للمقابلة الودية التي ستجمع هذا المساء بين المنتخب المغربي ونظيره الارجنتيني وديا، قبل كأس إفريقيا بمصر، بعيدا عن هذه الاجراءات، طنجة هاد النهار عامرة بالمغاربة من جميع المدن لي جاو واخا عارفين ميسي ماغاديش يلعب.
خارج الملعب جميع الناس على طول الطريق ملتحفين للأعلام الوطنية أو يرتدون أقمصة المنتخب، كولشي واقف كايدير السلفيات كاين لي كيتاصل بصحابو اتصال فيديو كينقل ليهم أجواء ما قبل المنازلة، من بين هاد الاجواء الجميلة كاين المتشاءمين دائما، فئة عريضة تتساءم من المشاركة فكأس إفريقيا كالعادة، جوج دالناس واقفين كيشوفو فالجماهير، أحدهم أخبر الثاني أنه مع المنتخب لكن المشاركة غاتكون بحال ديما خاوية، وزاد “عجبني الحال ملي زدحهوم ميسي، وماجاش ليهم، راه كيتعلقو فين يتفلقو”، مرافقه اومأ له برأسه دون أن يتحدث.
العدد ديال المتفاءلين كبير بزاف، العديد من الناس لي تلاقاتهوم “كود”، كيراهنو على المغرب ايربح اليوم المقابلة، ورغم سوء الاحوال الجوية الناس جايين يشجعو المنتخب، حيث قال أحد المشجعين ل”كود” : ” لمغاربة خاصهوم يستغلو الضعف لي كاين فيه المنتخب الارجنتيني واللي واكل الدق من الصحافة ديالو بسباب مستواه اللي تراجع، زيادة على عدم حضور ميسي، خاصهوم يفرجونا اليوم فكورة”.
أحمد أحد القاطنين فطنجة وهو أحد أبناء خريبكة قال ل”كود”، أنه ماغاديش يتفرج فالماتش من داخل الملعب حقاش ملي مشى يشري التذكرة لقا التذاكر الرخاص تسالاو وبقات غا ديال 200 درهم، مؤكدا أن الايام الاخيرة كانت طنجة بأكملها لا حديث لها غير مقابلة المغرب والارجنتين، وأن الجميع كيتسناو وليدات رونار يغلبو باش يفرحو الناس لي كاعيين من الأخبار الخايبة لي كاينة فهاد لبلاد.
مشجع آخر قال أن شباب طنجة باغي ينجح المقابلة باش يبينو لگاع الناس لي مابغاوش تلعب المقابلة هنا أن طنجة أنسب مكان للتظاهرات الدولية بجمهورها الزوين لي مكايدير صداع.
أحد الصحافيين الارجنتيين لي جاي مع البعثة ديال المنتخب قال في مراسلة تلفزيونية نهار اليوم أن جمهور طنجة كيفهم فالكورة بزاف، بل انهم كيعرفو على ميسي أكثر مما يعرفه الارجنتيين، وبأن مدينة طنجة زوينة بزاف حتى أنها كتنافس ايبيزا الاسبانية.
سوء الاحوال الجوية والرياح لي كتعرفها المدينة فهاد الاثناء خلا ناس يتفرجو من المقاهي المحيطة بالملعب، ولكن هذا لا يعني أن الناس ماجايينش حقاش الجامعة علنات على بيع 36 الف تذكرة لملعل كيهز 45 الف، ومازال بيع التذاكر خدام لحدود الساعة.