وگولو لينا شكون مول هاد الزبلة حتى “لوفيگارو” ولات كتنتاقد محمد السادس بعنف كبير. رسمو صورة كحلة زحلة ل20 عام من الحكم ما خلاو لا الثروة ديالو لا الفقر ديال المغاربة

اليوم خرجات على غير عادتها “لوفيگارو” الفرنسية مقال ف”التحليل” مقال على الملك محمد السادس. على ازمة الحكم. بهاد الشي تقريبا دارو العنوان. هاد الجريدة اليمينية اللي اول ما عطى الملك محمد السادس حوار بعد وصوله الي الحكم كان ليهم. اللي ديما العلاقة ديالها مع المغرب من زمان ماشي غير كبيرة. اكبر من كبيرة.
نشوفو اش قالو باختصار. هدرو على ظروف انتقال العرش من الحسن الثاني لمحمد السادس. على الامال اللي كانت معقودة على عهد جديد بخطاب غير مسبوق كيهدر على حقوق الانسان على حرية الانسان على كرامة الانسان على العيش الكريم للمواطن المغربي. هذا خطاب 12 اكتوبر 1999 واللي معروف عندها بخطاب المفهوم الجديد للسلطة.
من بعد هدر على اللي وقع. صورة كحلا خايبة رسمها. فيها 25 مليون مغربي كيعيشو الفقر مع الجهل مجموعين فين حين يالله الثلث ديال المغاربة اللي عايشين مزيان. هدر على الثروة ديال الملك هدرعلى تقاسم السلطة على المدونة على امور كثيرة. كلها بطريقة خايبة.
دابا علاش وصلنا لهاد الشي. ماشي من جريدة بحال “لبيراسيون” ولا “لوموند”. هادي راها “لوفيگارو”. جريدة يمينية محافظة دافعات علي الملكية حتى فسنوات الرصاص. اش وقع حتى خيرات خطها التحريري.
باين شي سماسرية هما مالين الزبلة. مع عشرين سنة من حكم الملك كينوضو شي وحدين كيبغيو يقدمو ريوسهم عارفين الاعلام الفرنسي ومتحكمين فيه. فالاخير كتكون هادي هي النتيجة.
دابا هاد الشي وقع والعلاقات المغربية الفرنسية عادية ما فيها لا ازمة لا والو.
بحال هادو اللي مكلفين بالتواصل بشكل مباشر او غير مباشر الخاص بالتسويق للقصر وللملك٬ خاصهم يخلصو والثمن غالي. خاصهم الفرشة.
رابط المقال