ولى بنعرفة ما بقاش رئيس الحكومة؟ جبد ليه وذنيه رئيس الدولة 4 المرات. اللي منطقي تكون حكومة يرأسها غير حزبي باش يطبقو هاداك المشروع التنموي اللي باغيين يوجدوه

انسحاب التقدم والاشتراكية من الحكومة لاسباب سياسية كيف قال بيانهم ولانهم كانت غادية تكون عندهم غير حقيبة وعادية كيف كيقولو خصومهم والتعطال اللي وقع فتشكيل هاد الحكومة. من عيد العرش اللي طلب فيه الملك من رئيس الحكومة يوجد ليه وزراء ومسؤولين قافزين وهو واحل. جبد ليه الملك فبيان للديوان الملكي يوم السبت 21 شتنبر باش استقبلو. البيان فيه “استفسر” رئيس الدولة رئيس الحكومة “حول تقدم تفعيل التوجيهات الملكية الواردة في خطاب العرش” الاخير والمتعلقة ب”رفع” رئيس الحكومة الى الملك “اقترحات بخصوص تجديد واغناء مناصب المسؤولية٬ سواء على مستوى الحكومة او الادارة”. هاد الاستفسار سبقو استفسارات اخرى وتكليفات ما دارهاش رئيس الحكومة فالسابق. دابا وصلات ل4.
بحال هادا واش ممكن يبقى رئيس حكومة؟ موحالش. اللي كيزيد يؤكد هاد الشي ان بنعرفة كيخسر حلفاؤو. خسر حليف استراتيجي اللي هو التقدم والاشتراكية. ايلى انساحبات احزاب اخرى غادي يبقى بلا اغلبية كاع. هادي موحالش يوصلو ليها. كاينة نقطة اخرى كتدفع فطريق التخلي عن بنعرفة تتعلق بما جاء فخطاب العرش الاخير. الملك اعلن على المشروع التنموي اللي غادية تقادو لجنة سيعينها هاد ليام. هاد اللجنة ايلى وجدات خارطة الطريق للتنمية فالمغرب ما خاصش حكومة تركب عليه.
ايلى بقات حكومة بنعرفة كيعني ان العدالة والتنمية هو الرابح الاكبر. دارت ليه حملة فابور. الاحزاب الاخري ما غادياش تقبل. ايلى كان هاد الشي خاصو يكون٬ فالحاجة لحكومة براس غير متحزب. هاد الشي كيخلق مشكل كبير. كيضرب هاد الديموقراطية اللي كنحاولو نوقفوها على رجليها فالمغرب. كيضرب كلشي دستور 2011 فالحيط.
بنكيران كان نصح صحابو باش يخرجو من الحكومة وما سمعوش منو. دابا يمكن يعيشو الذل. يبقاو ولكن الثمن كبير غاديين يخلصوه.