لقجع وعامل مكناس حلو مشكل “الكوديم”.. عينوا لجنة مؤقتة لي غادي تسير

فوزي لقجع، رئيس الجامعة الملكية المغربية لكرة القدم اجتمع مع عامل مكناس عبد الغني الصبار البارح الخميس فمقر العمالة بمكناس باش يشوفو شي حل للنادي المكناسي لكرة القدم، لي ارجع كيتنقل للمدن بجوج فراقي باش يلعب الماتشات ديال القسم الوطني للهواة.
لقجع اضطر يمشي لمكناس هو وجمال سنوسي، رئيس العصبة الوطنية للهواة وتلقاو مع المسؤولين ديال جوج فراقي ومعهم محمد بلماحي رئيس المكتب المديري للنادي المكناسي.
الاجتماع حضره عامل الإقليم وتطرق فيه فرقاء الكوديم إلى المشكل الرئيسي، لي واقع بين المكتب المديري، لي باغي يفرض الوصاية على جميع فروع الجمعية، وفرع كرة القدم، لي باغي أوحادي النشاط.
الاجتماع خلص إلى توحيد وجهات النظر بين المسيرين المضاربين بعضياتهم، لي اكدوا حسن نيتهم ورغبتهم في وضع حد لهذه الأزمة.
وتقرر فنهاية المطاف تشكيل لجنة مؤقتة غادي تسير الفريق مؤقتا حتا يتعقد الجمع العام بعد شهرين. وهاد اللجنة كتكون من فعاليات رياضية سبق ليها سيرات الكوديم من قبل، ويتعلق الأمر بعادل التراب وعزيز بنوتة وعز الدين الزروالي وخالد تاعرابت وعز الدين اليعقوبي وحسام القاسمي وعبد الحق بنشاوي ومراد بونوة.