مدينة مليلية محتلة جوج مرات محتلاها إسبانيا ورداتها جنة صغيرة والدخلة ديالها محتلينها الشمكارة المغاربة وردوها زبالة إذن عادي أنهم يصوتوا على اليمين المتطرف ويبغيو يتبنى عليها سور يحبس “البراون ووكرز”

مدينة مليلية محتلة جوج مرات محتلاها إسبانيا ورداتها جنة صغيرة والدخلة ديالها محتلينها الشمكارة المغاربة وردوها زبالة، أول حاجة كتلقاها ملي يالله كتفوت الحدود هو عرام ديال القاصرين حراكة مشمكرين وجنبهم كويلات مفرشين الخوردة، وحداهم حيط عامر بول وخاوي يال الشراب ومكتسمعش كلمة وحدة بالصبليونية، كتبغي غير تهرب من داك القنت فأقرب وقت، حتى كتوصل لمركز المدينة عاد كتلقى مليلية المدينة الاوروبية في أرض إفريقيا، الشوارع نقيين بزاف المدينة كلها مساحات خضراء وجرادي البعض منهم فيهم شباب مغاربة كيبرمو الجوانات، الأسواق الكبرى ضروري تلقى شي جوج قاصرين مغاربة بديك الحسانة ديال بالوتيلي كيعرضو يعاونو المتسوقين فدفيع الكروسة مقابل تدويرة، الخلاصة أنها مدينة نقية موسخينها بعض المغاربة.
اذن فراه عادي جدا أنهم يصوتو لليمين الإسباني وعادي جدا أنهم مكرهوش يكون صور داير بيها بحال لي باغي يدير ترامب، أنا كمغربي سائح نبغي نمشي لمليلية أو سبتة راه منكرهش يكون داير بيها سور يحميها من الوايت ووكرز، مدن زوينة وبنية تحتية ممتازة وبنادم نقي، صحاب البيكالات كولشي بالكاسك حتى المغاربة، وكولشي كيقطع من الشراطي، وأصلا غير كتنوي تقطع الشانطي كتلقى صحاب الطوموبيلات وقفو وكيتسناوك تقطع على خاطرك، بحال هاد مظاهر التحضر راها جزء من الحاجات لي كيبغيو يشوفوها المغاربة أثناء السياحة ديالهم، كيما الأوروبيين كيجيو للمغرب باش يشوفو التاريخ ويشوفو كيفاش كان عايش بنادم شحال هادي وكيفاش باقي، والى عندهم لفلوس يعيشو تجربة ألف ليلة وليلة في مراكش لي كتروج ليها البلاد، ولي كتبان فالأفلام لي كتصور في المغرب ديما.
بحال الفرنسيين لي عايشين هنا وكيصوتو على اليمين المتطرف لهيه، بحال الإسبان والمغاربة لي عندهم جنسية إسبانية وعايشين فمليلية وسبتة وصوتوا على اليمين، بجوجهم حيت عندهم إحتكاك مباشر مع المغاربة تبناو أفكار اليمين فبلدانهم، وهذا أمر عادي جدا حيت حنا مغاربة وكنعرفو بعضياتنا، فمن بعد سنوات من تخلي الدولة على دورها فتربية وتهذيب مواطينيها النتيجة هي هاد الصورة المشوهة لي فيها جزء كبير من الحقيقة لي عند الأجانب لي عندهم إحتكاك مباشر بينا علينا.