دنيا باطمة ولات محامي ديال نعمان بلعياشي.. اتهماتو بنت بالنصب عليها ف 40 مليون – فيديو

هاد 2019 غادي تسالي بالفضايح . هاد اليوماين خرجات بنت فعمرها 19 العام كتقول أن المغني نعمان بالعياشي نصب عليها واستغل حبها ليه باش يدي ليها فلوسها لي قيمتهم 40 مليون سنتيم.
البنت لي مابيناتش وجهها قالت أنها كانت في ألمانيا وأن نعمان كان مواعدها بالزواج وهي كانت كتبغيه وتموت عليه وكل مرة كانت تسيفط ليه 100 ألف و20 و 30 حتى لقات راسها عاطياه 40 مليون سنتيم.
القصة ماواضحاش وفيها غموض والمعني بالاتهامات سكت ومازال مادار حتى شي رد فعل ومقابل أغنيتو الجديدة “باينة”، في المقابل المغنية دنيا باطمة نصبات راسها محامي ديالو وخرجات في سناب شات كتدوي وتسول وتحاسب البنت منين جاوها الفلوس وعلاش مبيناتش وجهها.
ومن الفيديوهات كيبان أن باطمة باغة تكبر الموضوع باش تصفي حساباتها مع الموقع لي دار الفيديو مع البنت لأنها قالباها معاهم صباط وبقات كتقول وتعاود أن “هاد البوز كيشوه صورة البلاد وخاص نحاربوه”.
“كود” حاولات تتواصل مع بلعياشي ومدير أعمالو باش نعرفو رايو فهادشي لي واقع، لكن حتى واحد فيهم مجاوب.