هادشي مازال كاين فملاعب لافريك.. جمهور الهلال السوداني دخل للتيران باش يضرب جيد والماتش توقف 12 الدقيقة ولولا البوليس لكان الحكم المغربي في عداد الموتى – فيديو

للأسف الشديد الفوضى والتخلف مازال متفشين فملاعب لافريك رغم كل المحاولات، لتطوير كرة القدم والرقي بها.
رضوان جيد الحكم المغربي منع من قتلة ديال العصا البارح السبت بملعب الخرطوم في السودان، بعدما دخلات جماهير كثيرة باش تعدى عليه فالماتش، اللي كان كونتر الأهلي المصري، ضمن منافسات دوري أبطال إفريقيا.
العالم تفرج على المهزلة ديال خوتنا السودانيين اللي بغاوا يجلدوا الحكم، واخا كان أداؤه جيدا للغاية، ولم يرتكب اي اخطاء.
الجمهور السوداني ما تقبلش الهدف الأول ديال الأهلي المصري ماركاه محمد مجدي في الدقيقة 49، قبل ما يتعادل الهلال عن طريق عمر عبد الرزاق في الدقيقة 90.
الجمهور اقتحم أرضية الملعب وحاول مشجعون يضربوا الحكم جيد، الشي اللي خلا الماتش يتوقف أكثر من 12 ديال الدقائق.
الحكم جيد وجد نفسه محاصرا بالبوليس والعسكر، اللي لولاهم لكان الحكم المغربي في عداد الموتى.