محاكمة ليلى تأجلات. بوعشرين: ما سبيتش زهراش

المحكمة الابتدائية الزجرية بكازا أجلات مرة أخرى، اليوم الأربعاء، ملف متابعة ليلى الصرغاني وأختها كريمة بجريمتي الخيانة الزوجية والابتزاز الجنسي ل18 مارس 2020، بعدما طلبات محامية من هيئة فاس تنصبات اليوم فالملف مهلة لإعداد الدفاع.
وقبل هذشي، عبر النقيب السابق وعضو دفاع المطالبين بالحق المدني، عبد اللطيف بوعشرين، على استنكارو بسبب الشكاية اللي وجهها ضدو عبد الفتاح زهراش، عضو دفاع المتهمات فالملف، لنقيب المحامين فكازا، حسن بيراوين، كيقول فيها بللي بوعشرين هانو وسبو.
وطلب بوعشرين من القاضي يرجع يتحقق فمحضر الجلسات، ويشوف واش تلفظ بالعبارات اللي تكلم عليها زهراش وأكد أنها جات على لسانو بالحرف، وزاد “مايمكنش نبارطاجيو شكاية فالعالم الافتراضي هكذا، لابد من التحري فمحضر الجلسة السابقة، وأنا كنأكد بللي ما صدراتش عليا شي حاجة تفيد السب والإهانة”.
وزاد “أنا كنطلب من كاتب الضبط يدون كلامي، صحيح كانو مناوشات ومقاطعات عادية، لكن يستحيل نقوم بالسب كيف قال هذ الشخص هذا، وأنا مسؤول على كلامي، والله ياخد فهذ الشخص الحق”.
وتميزات الجلسة جميع الأطراف فالملف باستثناء الطرف المدني محمد الطاهري، فضلا عن حضور محامين كثار من هيئة دفاع كازا، واللي تنصبو للدفاع عن المحاميين في مواجهة ليلى وكريمة، فالوقت اللي غابو فيه كَاع أعضاء دفاع هذ الجوجات، احتجاجا على “دفعهم لمغادرة الجلسة السابقة من طرف دفاع الاطراف المدنية وإهانتهم والتشويش على حقهم فالتعقيب”.
وكانت ليلى رفعات شكاية من أجل تبوث نسب ابنتها “نور” من المحامي الطاهري، وكانوا محامين فالجلسة السابقة تقدمو بطلب عارض لرئيس الجلسة باش ينتظر قرار محكمة الاسرة فالموضوع قبل البت فالملف، وهو الطلب اللي رفضوه هيئة دفاع المحاميين على اعتبار أن “الجنائي يسبق المدني وليس العكس”.
وللإشارة فالمحامية فاطمة الزهراء الإبراهيمي كانت رفعات شكاية ضد زوجها وليلى، واتهماتهم بالخيانة الزوجية، قبل ماتتنازل للزوج ديالها وتتابع أخت ليلى كريمة كذلك بجريمة الابتزاز الجنسي.