قفروها اللحايا.. مركز الوقاية والمراقبة فميريكان: اللحيا كتساعد فانتقال عدوى “كورونا”

بعدما انتشر فيروس “كورونا” فمجموعة من الدول فكَاع أنحاء العالم، طلب مركز المراقبة والوقاية من الأمراض فميريكان من الميريكانيين باش يحسنو اللحية إلى كانوا غيستعملو الكمامات الطبية للوقاية من الفيروس، على اعتبار أن الشعر دالوجه، شحال ما كان طويل، يقدر مايخليش الماسك يقوم بالوظيفة ديالو مزيان إلى تقاس مع الجناب ديالو.
ووضح المركز، من خلال تصويرة آنفوكَرافية، بللي إلى كان الشعر واصل حتى للجناب ديال الماسك فيمكن يساعد على تسرب الفيروس ليه، وبالتالي أكثر حاجة آمنة ممكن يدير الإنسان باش يوقي راسو هي يحسن اللحية والموسطاش، أو على الأقل يحسن غير اللحية ويخلي الموسطاش إلى بغا.
هذ الآنفوكَرافي اللي نشرها مركز المراقبة والوقاية من الأمراض ماجديداش، حيت كان نشر وحدة بحالها فنونبر سنة 2017، فاش كانت واحد الحملة فميريكان كتدعي فيها الميريكانيين باش مايحسنوش، وقالوا من خلالها بللي الناس اللي كيوضعو هذ الماسكات ضروري يحسنو باش ايتعاداوش بالأمراض التنفسية.
وبحكم أن اللحية تقدر تساعد على تسرب الفيروس لجسم الإنسان وتخليه يتعادا بيه، فربما اللحاية ديالنا صعيب يتيقو بهذ الكلام، وغايبقاو متشبثين بيها واخا يدخل الفيروس للمغرب، وغايديرو الماسكات فوقها وإلى تعاداو بيه غيعتبروه “قضاء وقدر”.