تسجيل بؤرة لفيروس كورونا بشركة فعين السبع.. أزيد من 40 عاملة طلعو نتائج تحليلاتهم إيجابية

أزيد من 40 بنت كيشتغلو فشركة فالحي الصناعي عين السبع طلعو نتائج التحاليل اللي دارو على فيروس كورونا المستجد إيجابية، اليوم الأربعاء.
وحسب المعطيات المتوفرة، فالتحاليل اللي كانو داروها العشرات ديال لبنات، لبارح الثلاثاء، من يعد ما داروهوم فالحجر الصحي، بدات كتخرج النتائج ديالها اليوم، ويقدر هذ العدد يرتفع فالساعات القليلة اللي جاية.
وغادي يتم تتبع حالات كَاع المخالطين ديال هذ البنات، وكذلك عائلاتهم، حيت كاين احتمال يكون الفيروس انتقل ليهم حتى هوما
وللإشارة، فالعشرات ديال لبنات خرجو يغوتو ويحتجو قدام باب الشركة، نهار الاثنين اللي فات، بعدما تصابت زميلة ليهم بكورونا، ورفض الباترون ديالهم أنهم يكلسو فديورهم ومايخدموش.
وفهذ الاحتجاج، العاملات استنكرو الوضعية اللي خدامين فيها، واللي كتنعدم فيها حسبهم أدنى شروط الوقاية الصحية، بحكم أنهم كياكلو مجموعين، وكيخدمو مجموعين، ومكايناش يناتهم مسافة ديال الأمان.
ومن بعد ما دخلو الزميلة ديالهم للصبيطار واشتبه فإصابتها بكورونا زادو تخلعو البنات كثر، وبغاو يتوقفو على الخدمة كيف ما دارو شركات ومصانع كثيرة فنفس المنطقة، لكن الفيروس دغيا داز لمجموعة كبيرة منهم.
وحاولات "كود" تتصل بالمديرة الجهوية للصحة فجهة كازا سطات باش تسولها على الحالة ديال البنات الصحية، لكن تيليفونها بقا يصوني بلا جواب.