تسريب خارطة طريق ما بعد رفع الحجر.. اليوبي ل"كود": هي غير مسودة ما قبل أولية مبنية على الخيال والفرضيات.. درناها باش نناقشوها داخليا فقط والوثيقة الرسمية خدامين عليها

بعد تسريب خارطة طريق ماشي رسمية حول فترة ما بعد الحجر الصحي فزمن فيروس كورونا المستجد، كشف محمد اليوبي، مدير مديرية الأوبئة ومحاربة الأمراض، بللي هذ الوثيقة تنجزات من طرف المديرية نفسها، لكنها مجرد وثيقة عمل أولية غير دقيقة، والمديرية بصدد إعداد خارطة طريق نهائية غتكون أكثر دقة منها.
اليوبي وضح، فتصريحو ل"كود"، بللي المديرية فاللول فاش كتكون كتشتغل على شي خطة أو برنامج، كتخيل اللي بغات، وعاد كتناقش مع جميع الموظفين ديالها هذ الطرح اللي دارت، حيت فالأصل هذيك الوثيقة تستعمل كأرضية للنقاش فقط.
وزاد كيقول "هذي مجرد مسودة ما قبل أولية، حيت حتى المسودة كتكون أكثر دقة منها، أما هذ الوثيقة فهي مبنية على ما هو خيالي فقط، وكتطرح تصورات وفرضيات، عاد كنشوفو شنو الممكن فيها وشنو اللي ماشي ممكن وشنو اللي عندو جدوى… من بعد كنتوصلو بمقترح نهائي كنرفعوه لوزير الصحة، وهو بدورو كيدخل عليه تعديلات عاد كيقترحو على شركاء الوزارة، وعاد كتولي الوثيقة دقيقة ويمكن تخرج بشكل رسمي".
وغير هذ الصباح، خرجات وزارة الصحة بلاغ كتقول فيه بللي هذ خارطة الطريق ماشي رسمية، وبللي هي بصدد إعداد خطة عمل دقيقة كتاخذ بعين الاعتبار جميع المؤشرات اللي غتحدد سيناريوهات رفع الحجر الصحي بشكل سليم كيضمن قدرة البلاد فالتحكم بشكل فعال فالوضعية الوبائية.
وخارطة الطريق اللي تسربات كتشمل مجموعة من المعطيات، أبرزها سيناريوهات الحالة الوبائية من بعد الحجر الصحي، وكيفاش أعداد الإصابات غينقص بشكل كبير، وشنو خاص الوزارة تتاخذ كإجراءات باش مايتطورش الوباء وتبقى مسيطرة على الوضع، بالإضافة لتحليل الوضعية الوبائية فالجهات.