كانحس بالظلم فاش كانشوف راسي سادة عليا هادي شهر فالدار كانشوف الشمش غي من الشرجم و عباد الله طالقاها تسرح حتى وصلنا ل218 لحالة ! قمة الاستهتار

البارح تزادت 218 لحالة كورونا فالمغرب ! يعني هاد ميتين و الصرف لي مرضو غالبا مرضو فهاد الخمسطاشريوم الاخيرة ! يعني مورا ماتعلن الحجر الصحي و مورا الحملات د التوعية و مورا گاع الهضرة و الكلام و النقاشات و الطليب و الرغيب لي دارتو الدولة و مورا الصندوق د الدعم ... مورا هادشي كلو مازال الناس كايخرجو و يعرضو حياتهم و حياة عباد الله اخرى للخطر ! واش هادي ماشي قمة الاستهتار ؟
انا شخصيا ماخرجتش من الدار هادي شهر تقريبا ! شهر بالتمام و الكمام كانشوف الشمش غير من الشرجم ديال الدار ! و رجلي ماقاستش الگودرون د الزنقة ! شهر ديال الخدمة من الدار و الماكلة فالدار و الحياة فالدار ربعة و عشرين ساعة على ربعة و عشرين ! شهر بعيد على العائلة و الاحباب و الاصدقاء ! و من نهار تعلن الحجر الصحي خرجت جوج مرات تقديت و دخلت للدار !
البارح حسيت بالظلم فاش سمعت 218 لحالة ! واش انا بوحدي لي مطبقة الحجر الصحي ؟! كانشوف الفيديوات ديال عباد الله فالزنقة كايتقداو رابعة د الدجاج و جوج بطاطات و الدراري كايلعبو و الناس خارجين كايدورو فحالا ماواقع والو و كانسول راسي واش انا بوحدي لي مطبقة الحجر الصحي !؟ واش مشاركة فشي كاميرا خفية بلا خباري ؟!
كانعرف شخصيا بزاف د الناس جالسين فديورهم بسبب الحجر الصحي واخا هادشي خرج عليهم ماديا ! كاينين الناس لي فقدو مناصب الشغل ديالها كاين شي نقصو ليهم من الصاليرات كاين لي سيفطوه شوماج كاين لي ساد حانوتو و جالس كاياكل رزقو نهار على نهار ! الناس مقصحة و صابرة و جالسة متلزمة بالحجر الصحي فدارها و بوزبال مازال كايدور فالزنقة !
مايمكنش نراهنو على " وعي الشعب" باش نخرجو من هاد الازمة ! الشعب الاغلبية الساحقة ديالو بينها و بين الوعي سنوات ضوئية ! مايمكنش الناس و المقاولات كاتضرر اقتصاديا و بوگعبوب عوج خارج مع راساتو كاينشر كورونا و كايآذي راسو و يآذي عباد الله !
ضروري خاص الصرامة فتطبيق القانون و لي حصل يودي ! مايمكنش انا نرهن مستقبلي و خدمتي و بلاناتي بواحد بوزبال ماباغيش يحط زكو فالدار و يهنينا تادوز هاد الجايحة راه قمة الظلم ! الدولة كيما كانت حاضرة و ناضرة فالاول خاصها ماتتساهلش دابا و ايلا راه فحالا مادرنا والو ! غايبقاو الحالات يتزادو و الاقتصاد تقواد عليه و حتى هادوك لي صابرين فديورهم واحد النهار غايطلع ليهم الخرا و غايصدقو تاهوما خارجين ! ما حنا بديدي ماحنا بالفانيدي !