هادو تفاصيل أسعار الخضرة والديسير واللحم فسوق الجملة فكازا

بحال العادة كل أربعاء، دار سوق الجملة للفواكه والخضر التابع للمجلس الجماعي لمدينة كازا، البارح، ليست ديال الأثمنة الخاصة بالمنتوجات الفلاحية اللي كيتباعو بالكَرو فهذ السيمانة، باش يحدد السقف ديال الأثمنة والثمن الأدنى ديالها حسب جودة كل منتوج، وماتكون حتى شي زيادة فهذ الوقت اللي كتعرف البلاد حالة طوارئ صحية بسبب فيروس كورونا المستجد.
هذ السيمانة، الفواكه عرفو ارتفاع ملحوظ بين 50 سنتيم حتى ل2 دراهم لكل وحدة، باستثناء التفاح المحلي اللي نقص ثمنو شوية، وثمن لافوكا استقر وماتبدلش بالمقارنة مع السيمانة الليفاتت، بينما الخضرة حتى هي عرفات ارتفاع طفيف باستثناء ماطيشة اللي نقصات، وحتى اللحم غلا شوية.
بالنسبة لثمن اللحم بالجملة فالباطوار ديال كازا، لحم الغنمي ولا يدير دابا فالثمن الأدنى 45 درهم والثمن الأقصى 53 درهم للكيلو، والبكَري فالثمن الأدنى 54 درهم، والثمن الأقصى 58 درهم للكيلو.
بالنسبة للخضرة، الأثمنة ديالها بقات مستقرة، باستثناء بعض الخضر اللي عرفات زيادات طفيفة، وهكذا حدد السوق الأثمنة ديال الخضرة الأساسية بالكيلوكَرام ف: ماطيشة 1 درهم و2p فالثمن الأدنى و2 دراهم ونص فالثمن الأقصى، وخيزو 1 درهم و30 سنتيم فالثمن الأدنى و2 درهم و30 سنتيم فالثمن الأقصى، البصلة 3 دراهم ونص فالثمن الأدنى و5.50 دراهم فالثمن الأقصى، باطاطا 1 درهم و80 سنتيم فالثمن الأدنى و2.30 دراهم فالثمن الأقصى، البصلة الخضارية 1 و80 سنتيم فالثمن الأدنى و2 دراهم ونص فالثمن الأقصى.
وبخصوص الخضر لخرى، فالمكور أو الكرومب كيدير 70 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير 2 دراهم ونص فالثمن الأدنى و4 دراهم ونص فالثمن الأقصى، والخيار 2 دراهم فالثمن الأدنى و3 دراهم فالثمن الأقصى، والدنجال درهم و80 سنتيم فالثمن الأدنى و2 ونص فالثمن الأقصى، والكَرعة الحمرا 2 دراهم فالثمن الأدنى و4 دراهم فالثمن الأقصى.
أما بالنسبة للفواكه، عرفات استقرار فالأثمنة، لافوكا دايرة فالثمن الأدنى 25 درهم، والثمن الأقصى 35 درهم، البانان دبرا داير 9 دراهم الثمن الأدنى و12 الثمن الأقصى، البنان دالبلاد 5 دراهم فالثمن الأدنى و7 دراهم و30 سنتيم فالثمن الأقصى، الليمون 4 دراهم فالثمن الأدنى و6 دراهم فالثمن الأقصى، والتفاح دالبلاد 2,50 دراهم الثمن الأدنى و8 دراهم فالثمن الأقصى، والتفاح المستورد 8 دراهم والثمن الأدنى و13 درهم ونص الثمن الأقصى، والدلاح 2 درهم أقل ثمن و4 دراهم الثمن اللي طالع