باش يخفف عليهم أزمة كورونا.. القرض الفلاحي غيعطي كريديات للمقاولات والتجار والحرفيين كيوصل حتى ل100 مليون درهم

لونصا القرض الفلاحي عملية لدعم الإقلاع الاقتصادي بعد أزمة كوفيد-19، باش يساند المقاولات والتجار والحرفيين فالعالم الحضاري والقروي اللي كلات الدق من فيروس كورونا المستجد، ويمكنها من استئناف أو مواصلة أنشطتها بشكل عادي، من خلال جوج منتوجات كتمنح كريديات متوسطة أو طويلة المدى.
وحسب بلاغ للقرض الفلاحي، توصلات بيه "كود"، فهذ الكريديات غدي يمكن يستفدو منها المعنيين حتى للخر ديال دجنبر 2020، وغادي تتميز بنسبة فائدة مخفضة، فترة تسديد ممتدة على سبع سنوات مع فترة سماح محددة في سنتين، وغيوصل سقف القرض، حسب رقم المعاملات، من 10 آلاف حتى ل100 مليون درهم.
وهذ المنتوجات هي منتوج "CAM إقلاع"، وهو كريدي للمقاولات اللي تضررات من جايحة كورونا، واللي كيفوق رقم معاملاتها 10 مليون درهم، ثم منتوج "CAM إقلاع المقاولات الصغيرة جدا" اللي غيدعم المقاولات الصغرى والأشخاص الذاتيين والمعنويين، بحال التجار والحرفيين، اللي رقم معاملاتهم مكايتجاوزش 10 مليون درهم.