[email protected] أكد مسؤول حكومي ل"كود"، أن القرار الذي اتخذته الحكومة بخصوص منع التنقل انطلاقا من أو في اتجاه مدن طنجة، تطوان، فاس، مكناس، الدارالبيضاء، برشيد، سطات ومراكش، كان في محله. وأوضح المصدر المقرب من رئيس الحكومة أن الهدف من كل ذلك هو الحد من تدفق مواطني المدينة على البادية، خاصة المقيمين في المدن على مدن أخرى حقاش الحالة الوبائية بداخل هذه المدن أصبحت مثيرة للقلق. وشدد المسؤول الحكومي على أن القاعدة العامة تقول أن المدينة اللي كيكون فيها الوباء مخاصش الناس تخرج منها حقاش اللّي غادي يخرج غادي يدي معاه الوباء وغادي يوزعو على البلاد كولها. وشرح المسؤول الحكومي: "يلا كان مثلا مليون ديال الناس غادي يخرجو من كازا. بقات لينا 5 أيام لكن يلا قلنا ليهوم بقات 24 ساعة غادي تخرج 100 ألف، ويلا عطيناهم يومين غادي تخرج مثلا 400 ألف. إذن هنا الهدف لم يتحقق". وأضاف: "لا يمكن انجيو فهاد الوقت وانديرو للناس خاطرها ويخرجو وقتاش ما بغاو ويديو معاهوم الوباء، لكن من واجبنا أن نحافظ على صحة المواطنين وخا غادي نقلقوهوم لكن راه غادي نحميوهوم. وكان كنا خاطئين ديال بصح وكان داك الساعة قلنا للناس تحبس ومتخرجش. وهادشي علاش اعطينا شويا ديال الوقت باش اللي كان واجد يتحرك داك الساعة. بغينا الصحة والعافية والاقتصاد يمشي مزيان والناس تعيد لكن هادشي لا يجتمع". ودعا المواطنين إلى التفهم بأن الوضعية التي تمر منها بلادنا صعبة، موضحا بالقول: "راه مابغيناش هادشي لبلادنا لكن الوضع التي تمر منها بلادنا ادعى ذلك. الوضعية صعيبة. انهار درنا الطوارئ الصحية كان عدد المصابين أقل من الآن وعدد الأموات ارتفع في الوقت الراهن والناس يجب أن تفهم أن هناك صعوبات، وراه المشكلة هي نخلو ليهوم الوقت باش عاد يسافرو". وزاد المسؤول الحكومي: "هدفنا الآن هو الحفاظ على صحة الناس ويستحيل نخليوهوم يديرو اللي بغاو، وراه يمكن 5000 وعشرة آلاف عندها المرض وخاصنا نقلو من هادشي، والكيران دبا عندهوم الطاقة الاستيعابية هي 75 في المائة وكون خلينا ليهوم الوقت غادي يمشيو الناس واقفين والطاكسيات يلا كانو غادي يمشي 4 غادي يمشيو 7 والثمن ديال التذكرة يلا كانت 100 غادي ترجع 500 درهم، والخطافة غادي يجيو ديال الرباط والقنيطرة وغيرهوم، وهادشي غير معقول". وأكد أن حجم الناس كبير اللي باغيين يخرجو، مبرزا في الوقت نفسه أن بلادنا عندها مكتسبات والناس دارو منها مشكلة حقاش باغيّين مابغاو، وهادشي غير مقبول وراه كاين الموت كيدور". وختم المسؤول الحكومي حديثه مع "كود" بالتأكيد: "راه عمرنا وصلنا ل7 وفيات، وكنا نسجل بالعشرات والعشرين ديال الاصابات ودبا نسجل بالمئات، والحكومة اللّي هي مسؤولة مغاديش تدير الخاطر للناس لكن غادي تدير الواجب ديالها. واللي بغا يتقلق يتقلق ونحن آسفون حقاش هادي مصلحة المواطن".
