نايضا بين الداخلية والصحة.. عامل بركان لمندوب الصحة فاجتماع هاد الصباح: خرج عليا وقطاعكم ضعيف ومكاديرو والو..والمندوب ل"كود": رفضت نخرج والسبب قديم حيث رفضت نوقع على وثيقة استقبال جهاز سكانير قديم جابو العامل لسبيطار السعيدية

حرب وصراعات بين وزارة الداخلية ووزارة الصحة بانت نتائجها في تدبير أزمة كورونا، حيث شهد اجتماع مخصص للدخول المدرسي في اقليم بركان، مشاداة كلامية و"قطع ليا نقطع ليك" بين ممثل الداخلية عامل الاقليم، ومندوب وزارة الصحة.
مصادر حضرت الاجتماع قالت بأن العامل انتقد بشدة تدبير وزارة الصحة لأزمة كورونا في الاقليم، وقال بأن "التدبير كارثي وبلي الوزارة مدارت والو فهاد الاقليم".
ومن غير هادشي، فاش ناض مندوب الصحة يرد عليه ويدافع على وزارة الصحة، قاليه العامل خرج عليا من هاد الاجتماع.
هاد الرواية اكدتها مصادر مقربة من الطرفين.
بل اكثر من ذلك، أكد عبد القادر بنطه، المندوب الاقليمي لوزارة الصحة باقليم بركان، في اتصال مع "كود"، صحة هذه المشاداة.
واوضح بنطه ل"كود"، أنه "مع الظرفية ديال كوفيد درنا اجتماع كيفاش نديرو ف الاقليم في اطار مقاربة تشاركية، نتعاملو مع الدخول المدرسي، لكن تحول الاجتماع لقطاع الصحة الى اهانة للقطاع ولي".
وتابع بالقول :"العامل كيقول قطاع ضعيف وناس كتسنا التيست ومكاين والو".
لكن شنو سبب هاد الهجوم؟، يقول بنطه :"هادي مدة فاش كانت بدات كوفيد وقع مشكل ومسألة بسيطة عليها مكانش كيعيطلي ف الاجتماعات لي تايكونو بفيديو كونفيرونس وهاد المرة رسلي استدعاء شخصيا بحضور مجتمع المدني ورؤساء الجماعات والمسؤولين الامنيين".
هاد المسألة وفق المسؤول الصحي، هي "انه كان فاش كانت هنا الفرقة العسكرية اتفق العامل مع كولونيل وجابو سكانيز لمستشفى السعيدية وفاش جا سكانير تفاجأت حيث ملي قلبتو لقيتو ماشي جديد وطلبت وريقات معطاونيش ومبغيتش نوقع عليه".
وتابع :"فاش مبغيتش نوقع على وثيقة استقبال هاد السكانير، وبحضور جميع المصالح وبدا كيغوت باش نوقع استقبال هاد سكانير لي قديم ثمن ديالو كيفوق الثمن السكانير جديد".
وشدد المتحدث أن "هاد السكانير ناقص وقلت ليهم كنرفض هاد السكانير، لذلك تحملت المسؤولية وعلمت الوزارة حيث هاد سكانير سبق لو خدم من 2007 خدام تال 2017 وتعاود تقاد باش ناخدوه رفضت".
واضاف بنطه ل"كود" :"السكانير مكتشريهش الدولة ف بون اوكازيون وخرجت من الاجتماع وقفت هاد لانسطالاسيون ديال سكانير ومن بعد الوزارة رسلت سكانير جديد بلاصت سكانير قديم حيث سكانير حاجة خطيرة".
وتابع :"ميمكنش نوقع على الخردة ومن بعد نتحاسب وعلمت الوزارة".
واوضح المتحدث انه :"الزربة باش يجيبو سكانير حيث تعطلو علينا سكانيرات جاجايين من مريكان وصلو دبي ديك الساعة وفاش زربو وجابو سكانير قديم وانا رفضت وغوت عليا".
وبالعودة للاجتماع اليوم قال المندوب ل"كود" يك وفهاد الاجتماع لي وقع اليوم ف صباح عيطلي وكان عرض على التعليم وفاش وصلو للتحاليل ديال الاساتذة بدا العامل كينتقد فالوزارة نتوما مدايرينش وو رغم اننا حنا الاولين في طريقة تدبير كوفيد على مستوى السعيدية ".
وتابع :" قالي العامل نتا غادي تسكت وانا غادي نهضر وقالي خرج عليا وقلت ليه واش كتعامل معايا كشخص ولا كمؤسسة قالي الى مخرجتش نتا انا نخرج وانا منخرجش وقلت ليه كل واحد يتحمل المسؤولية وهو خرج وترفع الاجتماع".