بعدما دار اللجوء لفرنسا..شفيق لي تعرض للاعتداء ف حوار مع “كود”: ندمت علاش مخرجتش من المغرب والمثليين لي محميين هوما لي عندهم الفلوس والسلطة اما الناس العاديين لا

قال شفيق الشخص لي تعرض للاعتداء ليلة راس العام ديال 2019، ولي دار “البوز” :”انا نادم علاش ماخرجتش من المغرب قبل”، موضحا :”الناس لي عندهم ميولات بحالي ماخصهمش يبقاو فالمغرب، حيث لي عندهم الراحة ومرخصين ليهم يكونو مثليين هما اللي عندهم السلطة والفلوس اما العاديين بحالي لا”.
وأضاف شفيق في حوار مع “كود”، :”التوتر لي وقع مع عائلتي من بعد سبب لي نمشي بحالي من المغرب باش نخلي عائلتي مرتاحة نفسيا وتا انا نكون مرتاح”.
“كود”:قبل ما ندخلو ف أسئلة الحوار، قولينا شكون شفيق ومنين جا ومسارو:
أنا شفيق، 34 سنة من مواليد مدينة خريبكة، عندي باكالوريا سنة 2003، من بعد دخلت للمدرسة الملكية للصحة العسكرية دوزت فيها عامين، من بعد تخرجت وخدمت ف عدة مستشفيات عسكرية لما يقارب عشر سنوات.
وبعدها خديت الاستقالة وخدمت ف سيكتور بريفي من 2014 إلى شهر 5 ف 2019، وانا من عائلة ميسورة.
“كود”: نبداو، امتى مشيتي لفرنسا وعلاش اختاريتي هاد الوقت؟
مشيت لفرنسا ف أواخر شهر ماي 2019، بفيزا سياحة لأنه من بعد الارساليات لي درت لجميع السفارات الأجنبية (سويسرا، المانيا،..)، تواصلت كذلك مع جمعيات من بزاف ديال الدول باش يهضرو مع السفارات ديالهم باش ناخد فيزا خاصة وهادشي غادي ياخد وقت وداكشي لاش درت فيزا سياحية.
درت فيزا توريست حيث كانت عندي جميع الوثائق لي تسمح لي ناخدها من “وراق الصالير والخدمة والبنكة..”.
كنت غانمشي شهر 8 حيث كنت باغي ندوز رمضان هنا، لكن وقع مشكل، وكان كمين تنصب لي ف الخدمة. حيث كانت عندي بيرمانونس ودخل شخص سرق الكاشي ديال المؤسسة وشداتو الكاميرا”.
تم استدعائي من طرف الشرطة القضائية، باش يوريني السيد لي سرق الكاشي، هادشي لي خلاني نمشي بحالي حيث دار لي مشكل ف الخدمة وشكون يضمن لي منمشيش للحبس الى بقا بحال هادشي كيتعاود”.
“كود”: فاش وصلتي لفرنسا باش حسيتي؟ كيفاش تعاملو معك؟
حسيت بالأمان فاش جيت لفرنسا، ومايمكنش نقول لا بقا فيا الحال او توحشت البلاد حيث انا جاي مقتنع بأنه مكايناش العدالة فالمغرب بعدما دارو لي ديك الفضيحة”.
بمجرد اني وصلت طلبت اللجوء، وحاليا عندي تغطية صحية وعاطيني مساعدات مالية وغذائية وعايش حسن من المغرب الف درجة”.
حسيت بلي تهنيت من ديك البلاد. جيت قانع بلي بلاصتي ماشي ف المغرب
“كود”:نتا داير لجوء حاليا ولا استقرار عادي ف فرنسا؟
حاليا قدمت اللجوء، الضوسي ديالي كايتريتا، وماخصني والو .. عاطيني تغطية صحية، وعاطينا مساعدات مالية وغذائية كيف قلت مسبقا.
“كود”:واش ديك الحادثة ديال راس العام باقا مأثرة فيك؟ شنو علاقتك مع عائلتك؟ واش تفهمو وضعيتك؟
باقا مأثرة عليا وعلى العائلة كاملة.. داكشي لاش قررت نبعد، وعلاقتي معهم متوترة، وفضلت نبعد باش هوما يرتاحو نفسيا.
“كود”:ممكن تحكي لينا تجربتك الحالية ف فرنسا؟ وشنو رسائلك للمغاربة لي بحالك (عندهم نفس الميولات الجنسية) ومقدروش يخرجو ويواجهو خوفا من سلطة المجتمع؟
عايش بيخير وعلى خير، هنا بالعكس البوليس كيحمي الناس لي بحالي كثر من الناس “العاديين”، كاين احترام عموما بين الأمن والمواطن.
هنا فقط الى بغا يطلب منك غير الوراق كيكون احترام.
وبالنسبة للنصيحة لي نعطي للناس لي عندهم ميولات خاصة، ماشي بالضرورة يكون مثلي، واخا يكون مختلف الديانة، هنا في فرنسا كيحترموك غير متكونش داير مشاكل للناس، واخا تكون لابس شنو حبيتي.
هنا جمعيات كتحمي وكدافع على حقوق المثليين، كايدارو مؤتمرات وكاينين دي بواط دونوي، وكاين شارع خاص بالمثليين بدرابوات ديالهم.
المغرب مابقاش فيه الأمان، حيث كثر الاغتصاب والسرقة والعنف، مابقيتيش كتحس بالأمان.
حاجة وحدة لي ندمت عليها هي انني تعطلت باش نخرج من المغرب، مكانش علي نبقا فالمغرب.. ولكن ذلك الحادثة سرعات نخرج.
المغرب مديرو لناس لي عندهم الفلوس والسلطة، هادو لي عندهم ترخيص ديال المثلية عادي، بالنسبة للناس بحالي لا.