خنساء باطمة فازت بجائزة أفضل ممثلة في مهرجان فينيسيا السينمائي ففئة "اوريزون".. والممثلة: مغمورة بالفرحة والامتنان – تدوينة

الفنانة خنساء باطمة فازت بجائزة أفضل ممثلة في مهرجان فينيسيا السينمائي ضمن فئة آفاق horizon على دورها فالفيلم المغربي "الزنقة كونطاكت" للمخرج إسماعيل العراقي، اللي تعرض الأحد اللي فات، فالمهرجان فالدورة ديالو ال77.
وفتصريح سابق ل"كود" كانت قالت باطمة، أنها مستطعاتش تحضر هي ومجموعة من الزملاء ديالها للعرض الأول دالفيلم بسبب فيروس كورونا، لكن فالمقابل حضر المخرج العراقي، والممثلين أحمد حمود وسعيد باي وطاقم الفريق التقني.
واضافت خنساء باطمة، فتصريحها ل"كود"، أنها مازال ماشافتش الفيلم ومازال ما كونات عليه حتى شي انطباع لحد الساعة.
وكتبات خنساء هادي دقايق فتدوينة نشراتها على حسابها ففيسبوك: مغمورة بالفرحة والإمتنان.. هدشي اللي غنگول يقدر يبان فيه الصوابية ولاكين إيلا كان شخص واحد قادر يخرج أغنية أو حتى البوم للوجود.. فالسينما الأمر يختلف..
بدون قصة و سيناريو محبوكين، بدون اشتغال المخرج مع الممثلين على الشخصيات ديالهم، بدون إخراج "مغيز" سكريپت ومساعدين فالمستوى (معندهاش ختها بنفس الحدة فشي لغة أخرى هه) من غير خدمة متقونة د الكاميرامان والمساعدين ديالو، و تقنيي الصوت والإنارة، من غير ديكور مخدوم بحرفية وذكاء اللي يخلي الممثل يسهال عليه يدخل فالشخصية ديالو، من غير ماكياج و ألبسة تتماشى مع الشخصية، من غير تقنيين وإنتاج ساهرين على راحة الممثل..
وطبعا!! من غير ممثلين موهوبيين وكرماء، ومن غير وجود مخرج حمق حط التيقة ديالو فممثلة مبتدئة وحمقة..
مكنتش غناخد هاد لپخي اللي كنعتابرو تتويج لينا كاملين على تفانينا و التعب اللي دوزنا..
وهدشي علاش تنهديه ليكم كاااملين وتنكوليكم..
مغمورة بالفرحة والإمتنان..هدشي اللي غنگول يقدر يبان فيه الصوابية ولاكين إيلا كان شخص واحد قادر يخرج أغنية أو حتى البوم…
Publiée par Khansa Tintziri Batma sur Samedi 12 septembre 2020